ភ្នំពេញ៖ ស្រុកអូរយ៉ាដាវ ខេត្តរតនគិរី ជាស្រុកដែលមានសក្តានុពលកសិឧស្សាហកម្ម ពិសេសដំណាំកៅស៊ូ និងដំណាំស្វាយចន្ទី។ នៅក្នុងស្រុកអូរយ៉ាដាវ គឺមានផ្ទៃដីដាំដុះដំណាំទាំងពីរនេះសរុប ២៧៥៩៥ហិកតា ក្នុងនោះផ្ទៃដីដាំដុះកៅស៊ូមានចំនួន ៦៩២២ហិកតា, ផ្ទៃដីចៀរជ័រសរុប ៥៦៤៣ហិកតា និងដំណាំស្វាយចន្ទី មានផ្ទៃដីដាំដុះសរុប ១៥០៣០ហិកតា។

ស្រុកអូយ៉ាដាវមានឃុំចំនួន៧ ដូចជាឃុំបបរខា លំជ័រ ប៉ក់ញ៉ៃ ប៉ាតេ សេសាន សោមធំ និងឃុំយ៉ាងទុង ដែលឃុំទាំង៧ មានប្រជាពលរដ្ឋសរុបចំនួន ២៥៤០៤នាក់។ សម្តេចធិបតី ហ៊ុន ម៉ាណែត បានឱ្យដឹងនាថ្ងៃទី៧ ខែកញ្ញា ឆ្នាំ២០២៤ ថា ស្រុកអូរយ៉ាដាវ មានរោងចក្រកែច្នៃដំឡូងមីចំនួន១ និងរោងចក្រកែច្នៃជ័រកៅស៊ូចំនួន២ ដែលអាចបម្រើដល់វិស័យកសិឧស្សាហកម្មក្នុងខេត្តរតនគិរីនេះ៕