ភ្នំពេញ៖ ក្រសួងពាណិជ្ជកម្ម និងក្រុមហ៊ុន ភីធីធី (ខេមបូឌា) ចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពី «កិច្ចសហការជំរុញ និងបង្កើនការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី»។ ការតាំងបង្ហាញ និងលក់ផលិតផលខ្មែរ តាមរយៈ MoU នេះ គឺដើម្បីបង្កើនឱកាសទីផ្សារ និងផ្សព្វផ្សាយផលិតផលខ្មែរទៅកាន់សាធារណជន។

បើតាមការចុះផ្សាយរបស់ក្រសួងពាណិជ្ជកម្ម ក្រុមហ៊ុនភីធីធី នឹងសហការលើកកម្ពស់ផលិតផលខ្មែរលើទីផ្សារក្នុងស្រុក និងអភិវឌ្ឍន៍វិស័យពាណិជ្ជកម្មកម្ពុជា ពិសេសជួយដល់សហគមន៍កសិករ ផលិតករ សិប្បករ សហគមន៍ និងសមាគមផងដែរ។

ការចុះ MoU នេះដែរ បានធ្វើឡើង កាលទី១៧ ខែមករា ឆ្នាំ២០២៥ នៅទីស្តីការក្រសួងពាណិជ្ជកម្ម ដោយមានការចូលរួមពី លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម ថ្នាក់ដឹកនាំ និងមន្ត្រីពាក់ព័ន្ធរបស់ក្រសួងពាណិជ្ជកម្ម ព្រមទាំងថ្នាក់ដឹកនាំក្រុមហ៊ុនភីធីធី (ខេមបូឌា) ជាច្រើនរូប៕