ភ្នំពេញ៖ ក្រសួងពាណិជ្ជកម្ម និងទីភ្នាក់ងារសហប្រតិបត្តិការអាល្លឺម៉ង់ (GIZ) នឹងពង្រឹងការប្រើប្រាស់ថ្នាលអនឡាញ ASEAN Access (www.aseanaccess.com) ក្នុងការគាំទ្រលើការចូលទីផ្សារដែលឆ្លងកាត់ព្រំដែនសម្រាប់សហគ្រាសធុនតូច និងមធ្យម (SMEs) ដែលដឹកនាំដោយស្ត្រី។ ការពិភាក្សានេះ ធ្វើឡើងនៅទីស្តីការក្រសួងពាណិជ្ជកម្ម នាថ្ងៃទី២៩ ខែសីហា ឆ្នាំ២០២៤។

ក្នុងជំនួបពិភាក្សារវាងលោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម, លោកស្រី Sita Zimpel ប្រធានគម្រោង GIZ និងលោក Mathias Janke មន្ត្រីផែនការនៃ GIZ គឺដើម្បីពិនិត្យ និងពិភាក្សាលើគម្រោង «ការគាំទ្រដល់កិច្ចការពារអ្នកប្រើប្រាស់ កិច្ចការប្រកួតប្រជែង និងសហគ្រាសធុនតូច និងមធ្យម នៅក្នុងតំបន់អាស៊ាន»។

ជំនួបខាងលើនេះ ភាគីទាំងពីរ ក៏បានលើកឡើងអំពីការកសាងសមត្ថភាពសម្រាប់កិច្ចសន្ទនា និងកិច្ចសហប្រតិបត្តិការក្នុងតំបន់អាស៊ាន ពិសេសបញ្ហាប្រឈម និងវិធានការសម្រាប់លើកកម្ពស់គោលនយោបាយកិច្ចការពារអ្នកប្រើប្រាស់ និងកិច្ចការប្រកួតប្រជែងនៅក្នុងបរិបទឌីជីថល និងពាណិជ្ជកម្មតាមប្រព័ន្ធអេឡិចត្រូនិកផងដែរ៕