ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានលើកឡើងក្នុងសិក្ខាសាលាពិគ្រោះយោបល់ស្តីពី «សហគមន៍តំបន់ការពារធម្មជាតិ» ថា រាល់គម្រោងអភិវឌ្ឍន៍ និងវិនិយោគណា ដែលមិនទទួលបានការឯកភាពពីប្រជាសហគមន៍ក្នុងតំបន់ការពារធម្មជាតិ ត្រូវបិទបញ្ចប់ជាបន្ទាន់។ តាមការចុះផ្សាយរបស់ក្រសួងបរិស្ថាន នាថ្ងៃទី២២ ខែតុលា ឆ្នាំ២០២៤ រដ្ឋមន្ត្រីក្រសួងបរិស្ថាន ក៏បានជំរុញឱ្យអគ្គនាយកដ្ឋានសហគមន៍មូលដ្ឋាន បន្តតាមដាន និងត្រួតពិនិត្យគម្រោងអភិវឌ្ឍន៍ និងវិនិយោគទាំងអស់ ដែលស្ថិតនៅតំបន់ការពារធម្មជាតិ ត្រូវគោរពច្បាប់ជាធរមាន។

ឯកឧត្តមបណ្ឌិត អ៊ាង សុផល្លែត បានមានប្រសាសន៍ថា រាល់គម្រោងអភិវឌ្ឍន៍ និងវិនិយោគទាំងអស់ ដែលបានអនុញ្ញាតឱ្យដំណើរការ ត្រូវតែជួយបណ្តុះបណ្តាលជំនាញ និងពង្រឹងសមត្ថភាពដល់ប្រជាសហគមន៍ ដើម្បីផ្តល់ឱកាសនៅពេលអនាគត ដែលធ្វើឱ្យសហគមន៍អាចធ្វើជាម្ចាស់បាន និងបន្តអនុវត្តច្បាប់១០០% ប្រឆាំងបទល្មើសធនធានធម្មជាតិ។

ក្នុងឱកាសអញ្ជើញជាអធិបតីបិទសិក្ខាសាលាពិគ្រោះយោបល់ ដែលបានរៀបចំដោយអគ្គនាយកដ្ឋានសហគមន៍មូលដ្ឋាននេះ ឯកឧត្តមបណ្ឌិត អ៊ាង សុផល្លែត បានបញ្ជាក់ថា ក្រសួងបរិស្ថាន បាននិងកំពុងចូលរួមចំណែក និងផ្តល់ការគាំទ្រយ៉ាងពេញទំហឹង លើការចូលរួមរបស់សហគមន៍មូលដ្ឋាន ក្នុងគោលដៅលើកកម្ពស់ជីវភាព ការអភិវឌ្ឍសហគមន៍ ក្នុងន័យកាត់បន្ថយដល់ការដាក់សម្ពាធ លើការប្រើប្រាស់ធនធានធម្មជាតិ។ ជាមួយគ្នានេះ រដ្ឋមន្ត្រីក្រសួងបរិស្ថាន សង្ឃឹមថា៖ «នៅឆ្នាំក្រោយ យើងនឹងមានកូនត្នោត ១លានដើម និងកូនឈើចម្រុះកើនឡើងពី ២ទៅ ៣លានដើម ចែកជូនប្រជាពលរដ្ឋយកទៅដាំដោយឥតគិតថ្លៃផងដែរ»៕