ភ្នំពេញ៖ ស្ថានទូតអ៊ីស្រាអែល និងសភាពាណិជ្ជកម្មកម្ពុជា-អ៊ីស្រាអែល ប្រចាំកម្ពុជា គ្រោងបង្កើតវគ្គសិក្សាផ្នែកបច្ចេកវិទ្យាព័ត៌មាន (Coding) ដល់យុវជនកម្ពុជា។ នេះបើតាមការចុះផ្សាយរបស់ក្រសួងអប់រំ យុវជន និងកីឡា នាថ្ងៃទី២១ ខែកុម្ភៈ ឆ្នាំ២០២៥។

ក្នុងពីធីប្រកាសគាំទ្រគម្រោងបង្កើតវគ្គសិក្សាផ្នែកបច្ចេកវិទ្យាព័ត៌មាន ឯកឧត្តមបណ្ឌិត សោម រតនា ក្នុងនាមក្រសួងអប់រំ យុវជន និងកីឡា សង្កត់ធ្ងន់ពីសារសំខាន់នៃភាពជាដៃគូ ក្នុងការគាំទ្រដល់ការអភិវឌ្ឍមូលធនមនុស្ស និងបច្ចេកវិទ្យានៅកម្ពុជា ដែលជាបាវចនា ២សំខាន់ៗ ចែងក្នុងយុទ្ធសាស្រ្តបញ្ចកោណរបស់រាជរដ្ឋាភិបាលអាណត្តិទី៧។ ឯកឧត្តមបណ្ឌិត សោម រតនា បញ្ជាក់ថា ក្រសួងអប់រំ កំពុងវិនិយោគយ៉ាងច្រើនលើការអភិវឌ្ឍមូលធនមនុស្ស និងបច្ចេកវិទ្យា ប៉ុន្តែការចូលរួមគាំទ្រពីភាគីជាមិត្ត និងបណ្តាភាគីពាក់ព័ន្ធ នៅតែមានភាពសំខាន់ខ្វះមិនបាន ពិសេសលើការអភិវឌ្ឍបច្ចេកវិទ្យាព័ត៌មាន ដែលកំពុងមានការប្រែប្រួលយ៉ាងឆាប់រហ័ស។

លោកជំទាវ Orna Sagiv ឯកអគ្គរដ្ឋទូតអ៊ីស្រាអែល ប្រចាំកម្ពុជា បានលើកឡើងចំពោះគំនិតផ្តួចផ្តើមក្នុងការគាំទ្រដល់កុមារកម្ពុជា និងបង្ហាញនូវការគាំទ្ររបស់លោកជំទាវចំពោះគម្រោងបង្កើតវគ្គសិក្សាផ្នែកបច្ចេកវិទ្យាព័ត៌មាន (coding class) ដល់យុវជនកម្ពុជា។ ក្នុងពីធីប្រកាសគាំទ្រគម្រោងបង្កើតវគ្គសិក្សា ក៏មានការតាំងពិព័រណ៍ និងលក់ស្នាដៃគំនូររបស់ប្អូនៗកុមារ មកពីសាលា Tiny Toones ដែលពិធីនេះ មានគោលដៅលើកទឹកចិត្តដល់កុមារ ដែលជាវិចិត្រករវ័យក្មេង និងក៏ជាឱកាសប្រមូលថវិកា ដើម្បីឧបត្ថម្ភគាំទ្រដល់ដំណើរការរបស់សាលាផងដែរ៕