ភ្នំពេញ៖ ក្រុមហ៊ុនវិនិយោគធំៗចំនួន ១២របស់ចិន កំពុងស្វែងរកឱកាសវិនិយោគលើវិស័យសក្ដានុពល ដូចជា៖ វិស័យថាមពលស្អាត បរិស្ថាន សុខាភិបាល កសិកម្ម ឧស្សាហកម្ម ហិរញ្ញវត្ថុ និងវិស័យផ្សេងៗនៅកម្ពុជា។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី២០ ខែសីហា ឆ្នាំ២០២៤។

ក្នុងជំនួបពិភាក្សាជាមួយលោក Zhao Yudong ជាតំណាងគណៈប្រតិភូក្រុមហ៊ុនវិនិយោគចំនួន ១២នេះ សម្តេចធិបតី ហ៊ុន ម៉ាណែត បានលើកឡើងថា វិស័យសក្តានុពលដែលក្រុមហ៊ុនចំនួន១២ ចាប់អារម្មណ៍ គឺជាវិស័យអាទិភាពរបស់រាជរដ្ឋាភិបាល ដែលយកចិត្តទុកដាក់ និងត្រៀមផ្តល់កិច្ចសម្របសម្រួល ក៏ដូចជាការលើកទឹកចិត្តផងដែរ។ សម្តេចធិបតី ហ៊ុន ម៉ាណែត ក៏បានលើកទឹកចិត្តដល់គណៈប្រតិភូវិនិយោគ ឱ្យបន្តសហការជាមួយក្រសួង-ស្ថាប័នពាក់ព័ន្ធ ជាពិសេសក្រុមប្រឹក្សាអភិវឌ្ឍន៍កម្ពុជា ដើម្បីទទួលបានព័ត៌មានបន្ថែម និងអាចស្វែងយល់កាន់តែច្បាស់អំពីសក្ដានុពលវិនិយោគនៅកម្ពុជា។

នាយករដ្ឋមន្ត្រីសម្តេចធិបតី ក៏បានបង្ហាញអំពីគោលនយោបាយយុទ្ធសាស្ត្ររបស់រាជរដ្ឋាភិបាលកម្ពុជាក្នុងការបង្កើតនូវក្របខ័ណ្ឌសម្រាប់វិនិយោគិនបរទេស រួមមាន៖ ការដាក់ចេញនូវច្បាប់ស្ដីពីការវិនិយោគនៅកម្ពុជា, លិខិតបទដ្ឋានគតិយុត្ត និងវិធានការចាំបាច់នានា ជាមួយនឹងកញ្ចប់វិធានការលើកទឹកចិត្ត ដែលបង្កើតនូវបរិយាកាសវិនិយោគ។ ជាមួយគ្នានេះ លោក Zhao Yudong ប្រធានក្រុមហ៊ុន Everbright Group Everbright Sunshine Asset Management Co.,Ltd បានសរសើរដល់រាជរដ្ឋាភិបាលកម្ពុជា ដែលបានដាក់ចេញនូវគោលនយោបាយ និងវិធានការថ្មី ក្នុងការលើកទឹកចិត្តដល់វិនិយោគិន និងការធានានូវបរិស្ថានល្អសម្រាប់ការវិនិយោគនៅកម្ពុជា៕