ភ្នំពេញ៖ សហគមន៍កសិកម្មសាមគ្គីរុងរឿងខេត្តកំពត បានចុះកិច្ចសន្យាផលិតកម្មកសិកម្ម ជាមួយក្រុមហ៊ុនសាជីវកម្មសហគមន៍កសិកម្មកម្ពុជា (CACC) ដើម្បីផលិតស្រូវផ្ការំដួលសរីរាង្គក្នុងបរិមាណ ៧០០តោន លើផ្ទៃដី ២៧៧ហិកតា ក្នុងឆ្នាំ២០២៤-២០២៥។

តាមការចុះផ្សាយរបស់នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១៦ សីហា ការចុះកិច្ចសន្យាផលិតកម្មកសិកម្មលើដំណាំស្រូវ និងបទបង្ហាញស្តីពីផលិតកម្មកសិកម្មតាមកិច្ចសន្យានេះ ធ្វើឡើងក្រោមក្របខ័ណ្ឌគម្រោងខ្សែច្រវាក់ផលិតកម្មដោយភាតរៈបរិស្ថាន នៅសណ្ឋាគារសង្គហមិត្ត ខេត្តកែប។

ការចុះកិច្ចសន្យារវាងសហគមន៍កសិកម្មសាមគ្គីរុងរឿងខេត្តកំពត និង CACC មានការចូលរួមពីលោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្ម, តំណាងសហគមន៍កសិកម្មចំនួន២០ មកពីខេត្តកំពត និងខេត្តតាកែវ និងតំណាងក្រុមហ៊ុនសាជីវកម្មសហគមន៍កសិកម្ម សរុបប្រមាណ ១២០នាក់៕