ភ្នំពេញ៖ ក្រសួងពាណិជ្ជកម្ម និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ចុះហត្ថលេខាលើផែនការសកម្មភាពពាក់ព័ន្ធនឹងកម្មសិទ្ធិបញ្ញាសម្រាប់អនុវត្ត ឆ្នាំ២០២៥-២០២៧ របស់អង្គភាពកម្មសិទ្ធិបញ្ញាកូរ៉េ (KIPO)។ កិច្ចព្រមព្រៀងនេះ ធ្វើឡើងនាឱកាស ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម ដឹកនាំគណៈប្រតិភូកម្ពុជា ចូលរួមកិច្ចប្រជុំលើកទី៨ ប្រធានអង្គភាពកម្មសិទ្ធិបញ្ញាកូរ៉េ-អាស៊ាន «The 8th ROK-ASEAN Heads of IP Office Meeting»។

កិច្ចជំនួបពិភាក្សាការងារនេះដែរ ភាគីទាំងអស់ បានពិភាក្សាលើផែនការសកម្មភាព ដែលបានលើកឡើងដោយ ភាគី KIPO ដើម្បីអនុវត្តរួមគ្នាជាមួយក្រសួងពាណិជ្ជកម្ម និងក្រសួងឧស្សាហកម្ម លើកិច្ចសហប្រតិបត្តិការផ្នែកច្បាប់ នីតិវិធី និងឧត្តមានុវត្តន៍ថ្មី, ការបណ្តុះបណ្តាលកម្មសិទ្ធិបញ្ញា, កិច្ចការពារកម្មសិទ្ធិបញ្ញា, ប្រកាសនីយបត្រតក្កកម្មនិងគំនូរឧស្សាហកម្ម, ម៉ាកពាណិជ្ជកម្ម, ការលើកកម្ពស់ការយល់ដឹងពីកម្មសិទ្ធិបញ្ញា និងការលើកកម្ពស់ផលិតផលម៉ាកសម្គាល់ភូមិសាស្ត្រទំនិញ កម្ពុជានិងការកសាងកេរ្តិ៍ឈ្មោះម៉ាកជាដើម។

កិច្ចប្រជុំលើកទី៨ ប្រធានអង្គភាពកម្មសិទ្ធិបញ្ញាកូរ៉េ-អាស៊ាននេះ បានធ្វើឡើងចាប់ពីថ្ងៃទី១ ដល់ថ្ងៃទី៣ ខែកញ្ញា ឆ្នាំ២០២៥ នៅទីក្រុងសេអ៊ូល ប្រទេសកូរ៉េ ដោយក្នុងនោះ ក៏មានការចូលរួមពី លោកបណ្ឌិត WAN KI KIM ប្រធានអង្គភាព KIPO, ឯកឧត្តម ភោគ សុវណ្ណរិទ្ធិ រដ្ឋលេខាធិការក្រសួងឧស្សាហកម្ម, ឯកឧត្តម ង៉ែត វិបុល ទីប្រឹក្សាក្រសួងឧស្សាហកម្ម និង លោក សួន វិជ្ជា ទីប្រឹក្សាក្រសួង និងជាប្រធាននាយកដ្ឋានកម្មសិទ្ធិបញ្ញាផងដែរ៕