ភ្នំពេញ៖ ធនាគារក្នុងស្រុកចំនួន៨ បានចុះអនុស្សរណៈយោគយល់ជាមួយក្រសួងការងារ និងបណ្តុះបណ្តាលវិជ្ជាជីវៈ ក្នុងគោលបំណងឱ្យពលករ អាចខ្ចីប្រាក់ក្នុងកម្រិតអតិបរមាត្រឹម ៥ ០០០ដុល្លារ ដោយមិនត្រូវការទ្រព្យធានា និងមានរយៈពេលឥណទានអតិបរមា ២៤ខែ។ ការចុះអនុស្សរណៈនេះ ធ្វើឡើងក្រោមអធិបតីភាពសម្តេចធិបតី ហ៊ុន ម៉ាណែត កាលពីថ្ងៃទី៩ ខែសីហា ឆ្នាំ២០២៤។

សម្តេចធិបតី ហ៊ុន ម៉ាណែត បានកោតសរសើរ និងវាយតម្លៃខ្ពស់ ចំពោះក្រសួងការងារ និងធនាគារពាណិជ្ជចំនួន៨ ដែលបានចុះអនុស្សរណៈនៃការយោគយល់គ្នា ក្នុងការផ្តល់ឥណទាន ជាមួយអត្រាការប្រាក់ប្រចាំឆ្នាំត្រឹមតែ ៨,៥០% និងលក្ខខណ្ឌអំណោយផលសម្រាប់ពលករដែលចំណាយលើការបំពេញឯកសារ និងសេវាកម្មផ្សេងៗ មុននឹងចេញដំណើរទៅធ្វើការនៅបរទេសផងដែរ។ ក្រសួងការងារ បានឱ្យដឹងថា តាមរយៈការអនុស្សរណៈនេះ នឹងជួយកាត់បន្ថយបន្ទុកចំណាយរបស់ពលករដោយអាចជួយសន្សំជាមធ្យម១០% នៃការប្រាក់ក្នុង១ឆ្នាំ ព្រមទាំងបានលើកទឹកចិត្តពលករឱ្យប្រើប្រាស់កម្ចីផ្លូវការដោយជួយធានាថាពលករនឹងបន្តធ្វើការស្របច្បាប់នៅប្រទេសគោលដៅ។

ធនាគារចំនួន៨ ដែលបានចុះអនុស្សរណៈជាមួយក្រសួងការងារ មានដូចជា៖ ធនាគារ ខេប៊ីប្រាសាក់ ម.ក (KB PRASAC Bank), ធនាគារ អ៊ូរី (ខេមបូឌា) ម.ក (Woori Bank Cambodia) ,ធនាគារ ប្រៃសណីយ៍កម្ពុជា ម.ក (CP Bank) ,ធនាគារ កាណាឌីយ៉ា (Canadia Bank) ,ធនាគារ អេស៊ីលីដា ភីអិលស៊ី (ACLEDA Bank Plc.), ធនាគារ វឌ្ឍនៈអាស៊ី ចំកាត់ (ABA), ធនាគារ វីង (ខេមបូឌា) ម.ក (Wing Bank), និងធនាគារ អេស ប៊ី អាយ លី ហួរ ម.ក (SBI LY HOUR PLC)។ ការចុះអនុស្សរណៈរវាងធនាគារទាំង៨ជាមួយក្រសួងការងារនេះ បានឆ្លុះបញ្ចាំងនូវឆន្ទៈក្នុងការចូលរួមអនុវត្តទំនួលខុសត្រូវសង្គម ដោយផ្តល់នូវការសម្របសម្រួលលើបញ្ហាហិរញ្ញវត្ថុទៅដល់ពលករ និងសិក្ខាកាមឱ្យកាន់តែងាយស្រួលបន្ថែមទៀតពីរាជរដ្ឋាភិបាល៕