ភ្នំពេញ៖ រដ្ឋាភិបាលកម្ពុជា គ្រោងថវិកាចំនួន ១៣ ២៩០ប៊ីលានរៀល មានសមាមាត្រស្មើនឹង ៥៥,៦% នៃ ចំណាយចរន្តថវិកាថ្នាក់ជាតិ ត្រូវជា ៦,៣៥% នៃផ.ស.ស. ឬថយចំនួន ១,៩% ធៀបនឹងច្បាប់ហិរញ្ញវត្ថុឆ្នាំ២០២៤។ ការណ៍នេះផងដែរ បង្ហាញថា ថវិកាឆ្នាំ២០២៥ រងនូវសម្ពាធខ្លាំង ដោយសារអតុល្យភាពរវាងលទ្ធភាពនៃចំណូល និងតម្រូវការចំណាយ ដែលប្រឈមនឹងសម្ពាធកាន់តែធំ នៃតម្រូវការជាកាតព្វកិច្ចនានារបស់ក្រសួង-ស្ថាប័ន។

តម្រូវការជាកាតព្វកិច្ចនានារបស់ក្រសួង-ស្ថាប័ន ដែលត្រូវការថវិកាជាចាំបាច់ក្នុងការអនុវត្តសកម្មភាពអាទិភាពនេះដែរ គឺដើម្បីរួមចំណែកសម្រេចឱ្យបាននូវគោលដៅសូចនាករ ពាក់ព័ន្ធនឹងសមត្ថកិច្ច ដែលមានចែងក្នុងកម្មវិធី និងគោលនយោបាយរបស់រាជរដ្ឋាភិបាល នីតិកាលទី៧ ជាពិសេសយុទ្ធសាស្ត្របញ្ចកោណ ដំណាក់កាលទី១។

ជារួម ទំហំចំណាយមិនមែន បន្ទុកបុគ្គលិក ឆ្នាំ២០២៥ ត្រូវបានរក្សាក្នុងកម្រិតទំហំថវិកា ដែលកំណត់ក្នុងក្របខ័ណ្ឌថវិកា។ ចំណាយចរន្តថវិកាថ្នាក់ជាតិ ត្រូវបានវិភាជន៍តាមវិស័យ ហើយនៅកម្រិតក្រសួង-ស្ថាប័ននីមួយៗ ត្រូវបានវិភាជន៍បន្តទៅតាមកម្មវិធី អនុកម្មវិធី រហូតដល់ចង្កោមសកម្មភាព ព្រមទាំងឆ្លុះបញ្ចាំងលម្អិតទៅតាមមាតិកាសេដ្ឋកិច្ចនៃចំណាត់ថ្នាក់ថវិកា ដោយផ្អែកលើតម្រូវការ និងអាទិភាពចាំបាច់៕

ប្រភពពីសៀវភៅ៖ សង្ខេបថវិការជាតិ ឆ្នាំ២០២៥