ភ្នំពេញ៖ ក្រុមហ៊ុនជាច្រើន បានកំពុងពឹងផ្អែកលើបច្ចេកវិទ្យា ដើម្បីទាញយកផលប្រយោជន៍ផ្សេងៗ ដូចជាការសិក្សាពីដៃគូប្រកួតប្រជែង ការជំរុញផែនការយុទ្ធសាស្រ្ដ ក៏ដូចជាដើម្បីឱ្យប្រតិបត្តិការការងារងាយស្រួល និងរហ័សផងដែរ។ សហគ្រិនខ្មែរ បង្ហាញមុខងារសំខាន់ចំនួន៥ នៃបច្ចេកវិទ្យា ដែលនឹងជួយដល់អាជីវកម្មគ្រប់សណ្ឋាន ដូចខាងក្រោម៖

១. បណ្ដុំទិន្នន័យ៖ តាមរយៈការចងភ្ជាប់ជាមួយប្រព័ន្ធបញ្ញាសិប្បនិម្មិត ( Artificial Intelligence ឬ AI) ដំណើរការគ្រប់យ៉ាង ធ្វើឡើងយ៉ាងមានប្រសិទ្ធភាព និងងាយស្រួល។ ឧទាហរណ៍ Chatbot ដែលត្រូវប្រើសម្រាប់ដំណើរការសន្ទនាជាមួយអតិថិជនដោយស្វ័យប្រវត្តិ តាមរយៈការចងជាសំនួរ និងត្រៀមទុកចម្លើយ ចំណេញទាំងពេល និងកម្លាំងមនុស្ស ហើយរាល់ប្រត្តិបត្តិការ ប្រព័ន្ធមួយនេះនឹងចងទិន្នន័យទុក ហើយអាចវិភាគតម្រូវការរបស់អតិថិជនបានទៀតផង។

២. ពង្រីកកេរ្តិ៍ឈ្មោះបានឆ្ងាយចំណាយតិច៖ បច្ចេកវិទ្យាប្រើក្នុងប្រព័ន្ធផ្សព្វផ្សាយ មានបណ្ដាញសង្គម (Facebook Tik Tok Instagram...) គេហទំព័រ សារអេឡិចត្រូនិច (អ៊ីម៉ែល...) និងកម្មវិធីទូរសព្ទចល័ត ដែលម្ចាស់អាជីវកម្មអាចប្រើផ្សព្វផ្សាយព័ត៌មាន ធ្វើទីផ្សារឌីជីថល និងការធ្វើប្រូម៉ូសិនផ្សេងៗ។ ៣. ប្រសិទ្ធភាពនៃការទំនាក់ទំនង៖ ម្ចាស់ធុរកិច្ច អាចប្រើមធ្យោបាយទំនាក់ទំនងផ្សេងៗ ដូចជាតេឡេក្រាម ឬ ស្លេក (Slack) ដើម្បីទំនាក់ទំនងទាំងក្នុង និងក្រៅស្ថាប័ន ដើម្បីចែកចាយព័ត៌មានផ្សេងៗបានរហ័សទាន់ចិត្ត និងចំណេញពេល។ បើមានការប្រជុំផ្សេងៗ អាចធ្វើភ្លាមៗ គ្រប់ទីកន្លែងតាមប្រព័ន្ធអ៊ីនធើណិត និង តាមបច្ចេកវិទ្យា ដូចជា Microsoft Team, Zoom, ឬ Google Meet ដែលសុទ្ធ តែអាចប្រើដោយឥតគិតថ្លៃ។

៤. គ្រប់គ្រងប្រតិបត្តិការបានល្អ៖ បច្ចេកវិទ្យា អាចជាផ្នែកមួយជួយដោះស្រាយបញ្ហាចម្បងខ្លះរបស់ធុរកិច្ចខ្នាតតូច ដូចជាជួយសម្រួលការគ្រប់គ្រងហិរញ្ញវត្ថុ លំហូរសាច់ប្រាក់ ផ្ទេរប្រាក់ ប្រតិបត្តិការក្រុមការងារ និងការត្រួតពិនិត្យផ្សេងៗ។ បច្ចេកវិទ្យា ក៏អាចវិភាគទិន្នន័យ និងវាយតម្លៃកិច្ចការផ្សេងៗ តាមការកំណត់ផងដែរ ដូច្នេះម្ចាស់អាជីវកម្ម មិនសូវចំណាយធនធានច្រើនលើកិច្ចការទាំងនោះ ហើយអាចដឹងច្បាស់ពីស្ថានភាពជាក់ស្ដែងនៃដំណើរការអាជីវកម្ម។ ឧទាហរណ៍ដូចជា កម្មវិធីទូរសព្ទដៃ KOTRA-Riel, Kotluy និង Jamnay ដែលផ្ដោតលើការជួយសម្រួលដល់ ដំណើរការគ្រប់គ្រងហិរញ្ញវត្ថុ តាមដានលំហូរសាច់ប្រាក់ និងប្រតិបត្តិការគណនេយ្យ ក្នុងដំណើរការអាជីវកម្មខ្នាតតូច។

៥. បង្កើនផលិតភាពការងារ៖ បច្ចេកវិទ្យាមានមុខងារស្វ័យប្រវត្តិ ដោយប្រតិបត្តិការទៅតាមការកំណត់របស់ម្ចាស់អាជីវកម្ម ដែលកំណត់ម្ដងប្រើប្រាស់រហូត បើចង់ផ្លាស់ប្ដូរអ្វីមួយទើបកំណត់ម្ដងទៀត។ ឧទាហរណ៍ បើកប្រាក់ខែឱ្យបុគ្គលិកទៀងទាត់ ដោយសហការជាមួយធនាគារណាមួយ ដើម្បីកំណត់ប្រព័ន្ធស្វ័យប្រវត្តិ នោះដល់ពេលកំណត់ ប្រាក់ខែទាំងអស់ នឹងបញ្ចូលចូលគណនីបុគ្គលិកគ្រប់គ្នា ដោយមិនពិបាកនៅរាប់លុយ ចាំបំពេញឯកសារណាមួយឡើយ៕