ភ្នំពេញ៖ អង្គការមូលនិធិកុមារកម្ពុជា (CCF) បានជួយកុមារ លោកយាយលោកតា និងសហគមន៍ដែលជាគ្រួសារខ្វះខាតនៅកម្ពុជា ប្រមាណជាង ៤៣០០នាក់ ក្នុងរយៈពេល ២០ឆ្នាំ។ នេះបើតាមការចុះផ្សាយរបស់អង្គការមូលនិធិកុមារកម្ពុជា កាលពីថ្ងៃទី៦ ខែសីហា ឆ្នាំ២០២៤។

ឆ្នាំ២០២៤ គឺជាគំរប់ខួប ២០ឆ្នាំរបស់អង្គការមូលនិធិកុមារកម្ពុជា ដោយកន្លងទៅក្នុងឆ្នាំ២០០៤ អង្គការមួយនេះបានចាប់ផ្តើមជាមួយកុមារចំនួន ៤៥នាក់តែប៉ុណ្ណោះ ដើម្បីផ្តល់នូវការសិក្សាមួយដ៏ល្អបំផុតដល់ពួកគេ។ ចំពោះសប្បុរសជន ដែលមានបំណងជួយដល់កុមារ លោកយាយលោកតា និងសហគមន៍នៅកម្ពុជា អាចបរិច្ចាគថវិកាតាមរយៈhttps://link.payway.com.kh/i4283240C មកកាន់អង្គការមូលនិធិកុមារកម្ពុជា។

អង្គការមូលនិធិកុមារកម្ពុជា (CCF) ត្រូវបានចុះបញ្ជីនៅកម្ពុជាជាអង្គការមិនមែនរដ្ឋាភិបាល តាមរយៈអនុស្សរណៈយោគយល់ជាមួយរាជរដ្ឋាភិបាលកម្ពុជា ដើម្បីផ្តល់សិទ្ធិឱ្យធ្វើសកម្មភាពមនុស្សធម៌ និងអនុវត្តគម្រោងផ្សេងៗកម្ពុជា។ អង្គការមូលនិធិកុមារកម្ពុជា មានបេសកកម្មផ្លាស់ប្តូរជីវិតកុមារក្រីក្រ ជនក្រីក្រ និងអ្នកខ្វះខាតបំផុតនៅកម្ពុជា តាមរយៈការផ្តល់ការអប់រំប្រកបដោយគុណភាពខ្ពស់ ការបណ្តុះបណ្តាលភាពជាអ្នកដឹកនាំ និងកម្មវិធីជួយដោយផ្ទាល់៕