ភ្នំពេញ៖ ABA បន្តដើរតួនាទីយ៉ាងសំខាន់ក្នុងការគាំទ្រសកម្មភាពសេដ្ឋកិច្ចរបស់កម្ពុជា ដែលក្នុងនោះ ABA រំពឹងថាកំណើនប្រាក់កម្ចី នឹងបន្តស្ថិរភាពក្នុងអត្រា ១៤% ដែលមានទំហំទឹកប្រាក់សរុបចំនួន ៨,៣ពាន់លានដុល្លារក្នុងត្រីមាសទី២ ឆ្នាំ២០២៤។ តាមការរាយការណ៍របស់ធនាគារ ABA កាលពីថ្ងៃ៣១ ខែកក្កដា ឆ្នាំ២០២៤ បានឱ្យដឹងថា ប្រាក់កម្ចីទាំងនេះ នឹងជំរុញដល់ការខិតខំប្រឹងប្រែងរបស់សហគ្រាស និងសមត្ថភាពរបស់ប្រជាពលរដ្ឋកម្ពុជា ដោយរួមចំណែកដល់ការអភិវឌ្ឍសេដ្ឋកិច្ចប្រកបដោយថាមវន្ដ។

ធនាគារ ABA បានបញ្ជាក់ថា សន្ទុះនៃកំណើនអតិថិជន ជំរុញដោយនិន្នាការឌីជីថល គឺមានការបានកើនឡើង៣៤% ធៀបនឹងរយៈពេលដូចគ្នាកាលពីឆ្នាំ២០២៣។ ការកើនឡើងនៃនិន្នាការប្រើប្រាស់ឌីជីថលនេះ បង្ហាញពីឌីជីថលុនីយកម្មនៅកម្ពុជា កំពុងមានភាពពន្លឿនទៅមុខនៅក្នុងទីផ្សារ។ ចំពោះ កំណើនប្រាក់បញ្ញើវិញ ABA នឹងមានប្រាក់បញ្ញើសរុបកើនដល់ ២០% សម្រេចបាន ៩,៨ពាន់លានដុល្លារនៅក្នុងត្រីមាសទី២ ឆ្នាំ២០២៤ ធៀបនឹងរយៈពេលដូចគ្នាកាលពីឆ្នាំ២០២៣ ដែលមាន ៨,២ពាន់លានដុល្លារ។

ធនាគារ ABA បានបញ្ជាក់ថា មូលធនរបស់ភាគហ៊ុនិករបស់ ABA នឹងទទួលបានកំណើន ១៩% ដែលសម្រេចឈានដល់ ១,៩ពាន់លានដុល្លារក្នុងត្រីមាសទី២ ឆ្នាំ២០២៤។ កំណើននេះ បង្ហាញពីមូលដ្ឋានដើមទុនរបស់ ABA ដែលពង្រឹងជំហររបស់ខ្លួន សម្រាប់កំណើនផលបត្រនាពេលអនាគត៕