ភ្នំពេញ៖ ប្រទេសនូវែលសេឡង់ ផ្តល់អាហារូបករណ៍ចំនួន ៣៥កន្លែង សម្រាប់ថ្នាក់ក្រោយឧត្តមសិក្សា ដល់ពលរដ្ឋកម្ពុជា ទាំងក្នុងវិស័យសាធារណៈ និងឯកជន លើមុខវិជ្ជាពាក់ព័ន្ធនឹងការប្រែប្រួលអាកាសធាតុនិងបរិស្ថាន, ការគ្រប់គ្រងគ្រោះមហន្តរាយ, សន្តិសុខស្បៀងនិងកសិកម្ម, ថាមពលកកើតឡើងវិញ, អភិបាលកិច្ច និងការបង្រៀនភាសាអង់គ្លេស (TESOL)។

ការចុះផ្សាយរបស់ក្រសួងអប់រំ យុវជន និងកីឡា នាថ្ងៃទី០៧ ខែកុម្ភៈ ឆ្នាំ២០២៥ បញ្ជាក់ថា អាហារូបករណ៍ក្រោមកម្មវិធី Manaaki New Zealand Scholarships (MNZS) នេះ បេក្ខជន អាចទៅបន្តការសិក្សានៅសាកលវិទ្យាល័យនានា នៅប្រទេសនូវែលសេឡង់ ក្នុងឆ្នាំសិក្សា២០២៦ ដោយនឹងទទួលបានការផ្តល់ជូនថ្លៃសិក្សា ថ្លៃទិដ្ឋាការ ប្រាក់ឧបត្ថម្ភពេលទៅដល់ ប្រាក់ឧបត្ថម្ភសម្រាប់ចំណាយប្រចាំថ្ងៃ និងថ្លៃសំបុត្រយន្តហោះទៅមកផងដែរ។

បេក្ខជន និងបេក្ខនារី ដែលមានចំណាប់អារម្មណ៍ ចំពោះកម្មវិធីអាហារូបករណ៍ខាងលើ អាចដាក់ពាក្យដោយផ្ទាល់ តាមរយៈគេហទំព័រ www.nzscholarships.govt.nz/apply-online ឱ្យបានមុនថ្ងៃទី២៨ ខែកុម្ភៈ ឆ្នាំ២០២៥។ សម្រាប់ព័ត៌មានបន្ថែមអំពីកម្មវិធីអាហារូបករណ៍ខាងលើ បេក្ខជនអាចទាក់ទងការិយាល័យ IDP Education (Cambodia) សាខាទួលទំពូង ឬតាមរយៈអ៊ីមែល [email protected] ឬតាមរយៈទូរសព្ទលេខ ០២៣ ២២២ ០៦៣៕