ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម Lee Cheol-Woo អភិបាលខេត្តក្យង់សាំងប៊ូកដូនៃសាធារណរដ្ឋកូរ៉េ បានចុះពិនិត្យមើលរោងចក្រវីដាប់ប៊ែលយូ&ស៊ី ឯ.ក (VW&C CO., LTD) ទៅលើសង្វាក់ផលិតកម្មផ្គុំដំឡើង ម៉ូតូ កង់ និងរ៉ឺម៉ក ដើរដោយថាមពលអគ្គិសនី និងឧបករណ៍បញ្ចូល ឬសាកថ្ម។

ទន្ទឹមនឹងឱកាសដែលឯកឧត្តម ហេង សួរ ចុះពិនិត្យរោងចក្រនៅទីតាំងបណ្តោយផ្លូវជាតិលេខ១ ក្នុងស្រុកកៀនស្វាយ ខេត្តកណ្តាល កាលពីថ្ងៃទី២៨ ខែកក្កដា ឆ្នាំ២០២៤ នេះ ឯកឧត្តមរដ្ឋមន្ត្រីក្រសួងការងារ ក៏បានអរគុណដែលវិនិយោគិនកូរ៉េសម្រេចចិត្តបោះទុនវិនិយោគនៅកម្ពុជាដើម្បីបង្កើតរោងចក្រមួយនេះ។ ឯកឧត្តម ហេង សួរ លើកឡើងថា រោងចក្រមួយនេះបានបង្កើតឱកាសការងារឱ្យយុវជន និងពលរដ្ឋបានធ្វើការក្នុងរោងចក្រដែលមានលក្ខណៈស្តង់ដារកូរ៉េ និងបានសំណេះសំណាលជាមួយអតីតសិស្សវិទ្យាស្ថានជាតិពហុបច្ចេកទេសកម្ពុជា(NPIC) ដែលបម្រើការងារក្នុងរោងចក្រនេះផងដែរ។

រោងចក្រ VW&C CO., LTD ត្រូវបានដាក់ដំណើរការដំឡើង នៅឆ្នាំ២០២៣ និងមានសមត្ថភាពផ្គុំបានចំនួន១០០ ទៅ២០០គ្រឿងក្នុងមួយថ្ងៃ នៅចុងឆ្នាំ២០២៤ និងដើមឆ្នាំ២០២៥។ នៅក្នុងតំបន់អាស៊ាន ក្រុមហ៊ុននេះ បានសម្រេចចិត្តបោះទុនវិនិយោគនៅកម្ពុជាមុនគេ ខណៈដែលបានសិក្សាគម្រោងវិនិយោគនៅបណ្តាប្រទេសផ្សេងទៀតដូចជាថៃ និងម៉ាឡេស៊ីជាដើម៕