ភ្នំពេញ៖ គិតត្រឹមឆមាសទី១ នៃឆ្នាំ២០២៤ ប្រជាជនកម្ពុជាសរុបចំនួន ៤លានគណនី កំពុងប្រើប្រាស់កម្ចីឥណទានពីគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទូទាំងប្រទេស សរុបប្រមាណ ២៣៨,១ ទ្រីលានរៀល ឬស្មើនឹង ៥៨,៩ ពាន់លានដុល្លារ។ នេះបើតាមរបាយការណ៍របស់ធនាគារជាតិនៃកម្ពុជា ដោយបានបញ្ជាក់បន្ថែមថា ឥណទានអតិថិជនដែលមានទំហំជិត ៥៩ពាន់លានដុល្លារនេះ បានកើនឡើងចំនួន ២,៦%។

ធនាគារជាតិ នៃកម្ពុជា បានបញ្ជាក់ថា កំណើនឥណទានដែលមានចំនួន២,៦%នេះ មានការថមថយ ដោយសារភាពទន់ខ្សោយនៃការងើបឡើងវិញនៃវិស័យសេដ្ឋកិច្ចមួយចំនួន គួបផ្សំនឹងការផ្តល់ឥណទានប្រកបដោយភាពប្រុងប្រយ័ត្នរបស់គ្រឹះស្ថានធនាគារ និងហិរញ្ញវត្ថុ។ ក្នុងរយៈពេល ៦ខែនៃឆ្នាំ២០២៤នេះ ប្រព័ន្ធធនាគារកម្ពុជា បានរក្សាភាពធន់ដោយទ្រព្យសកម្មរបស់ប្រព័ន្ធធនាគារមានទំហំ ៣៥៦,៩ ទី្រលានរៀល ឬប្រមាណ ៨៨,៣ ពាន់លានដុល្លារ ដែលមានកំណើន ៦,១%។

របាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ របស់ធនាគារជាតិ បានបញ្ជាក់ថា គ្រឹះស្ថានធនាគារ និងហិរញ្ញវត្ថុ បានចូលរួមលើកកម្ពស់បរិយាបន្នហិរញ្ញវត្ថុជាបន្តបន្ទាប់ ដែលបានឆ្លុះបញ្ចាំងតាមរយៈកំណើនគណនីចំនួន២ រួមមាន៖ គណនីប្រាក់បញ្ញើអតិថិជនសរុបចំនួន ២១,៣លានគណនី ដែលមានកំណើន ១៣,៤% គិតជាទឹកប្រាក់ប្រមាណ ២០៩,៩ ទ្រីលានរៀល ឬស្មើនឹង ៥១,៩ពាន់លានដុល្លារ និងគណនីឥណទានអតិថិជនដែលមានចំនួន ៤លានគណនី៕