ភ្នំពេញ៖ អ្នកប្រឡងចូលក្របខ័ណ្ឌរដ្ឋ ចាំបាច់ត្រូវវិនិយោគលើការបង្កើនសមត្ថភាពខ្លួនឯង តាមរយៈការខិតខំលះបង់កម្លាំងកាយចិត្តខិតខំរៀនសូត្រ មិនមែនវិនិយោគរកខ្សែ រកសាច់ញាតិ ដើម្បីយកថវិកាទៅសូកប៉ាន់នោះទេ។ នេះជាការលើកឡើងរបស់សម្តេចធិបតី ហ៊ុន ម៉ាណែត កាលពីថ្ងៃទី១០ ខែមិថុនា ឆ្នាំ២០២៤។

សម្តេចធិបតីនាយករដ្ឋមន្រ្តី បានបញ្ជាក់បន្ថែមទៅកាន់អ្នកចង់ប្រឡងចូលក្របខ័ណ្ឌរដ្ឋ ថា កូនខ្មែរយើងដែលចង់ក្លាយជាមន្រ្តីបម្រើរាស្រ្ត គឺត្រូវចូលរួមដោយស្ម័គ្រចិត្តរួមទាំងការខិតខំលះបង់ និងត្រូវបង្កើតផ្នត់គំនិតជាប់ដោយជោគជ័យ ដោយសារសមត្ថភាព។ សម្តេចធិបតី ហ៊ុន ម៉ាណែត បានលើកជាឧទាហរណ៍ថា ថ្មីៗនេះទើបនឹងមានការប្រឡងជ្រើសរើសគ្រូកម្រិតអនុវិទ្យាល័យ ដែលមានបេក្ខជនប្រឡង ៣ ៣០០០នាក់ ជាប់តែ ៤០០នាក់ មានន័យថា ជាង ៣ម៉ឺននាក់ គឺបានធ្លាក់។ ចំពោះបេក្ខជន ដែលគិតថាលទ្ធផលមិនសុក្រិតភាព នោះក្រសួងនឹងត្រួតពិនិត្យឯកសារប្រឡងឡើងវិញ។

សម្តេចធិបតី ហ៊ុន ម៉ាណែត បានអំពាវនាវដល់គណៈកម្មការរៀបចំការប្រឡងនានា និងក្រសួងពាក់ព័ន្ធទាំងអស់ចូលរួមពង្រឹង និងជំរុញសុក្រិតភាព និងតម្លាភាព ដើម្បីធានាភាពជឿជាក់ដល់បេក្ខជនប្រឡងឱ្យពួកគាត់អាចចូលក្របខ័ណ្ឌរដ្ឋបានដោយសមត្ថភាពផ្ទាល់ខ្លួន។ សម្តេចធិបតី ហ៊ុន ម៉ាណែត លើកឡើងបន្ថែមបែបនេះក្នុងពិធីបិទវគ្គបណ្តុះបណ្តាលឆ្នាំ២០២៣ និងបើកវគ្គបណ្តុះបណ្តាលឆ្នាំ២០២៤ របស់សាលាភូមិន្ទរដ្ឋបាល៕