ភ្នំពេញ៖ កម្ពុជា និងម៉ាឡេស៊ី បានព្រមព្រៀងគ្នាបើកផ្លូវដល់អ្នកជំនួញម៉ាឡេស៊ី ដែលចង់មកវិនិយោគលើដំណាំស្វាយ, ម្នាស់ និងអំពៅ នៅកម្ពុជា។ ក្នុងជំនួបជាមួយឯកអគ្គរដ្ឋរាជទូតម៉ាឡេស៊ី ប្រចាំកម្ពុជា ឯកឧត្តមរដ្ឋមន្ត្រីកសិកម្ម លើកទឹកចិត្តដល់វិនិយោគិនម៉ាឡេស៊ី ផ្តោតលើខ្សែច្រវាក់ផលិតកម្ម និងការនាំចេញ។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម Datuk Eldeen Husaini Mohd Hashim ឯកអគ្គរដ្ឋរាជទូតម៉ាឡេស៊ី ប្រចាំនៅកម្ពុជា បានលើកឡើងពីការចុះអនុសារណៈ នៃការយោគយល់គ្នា ក្នុងកិច្ចសហប្រតិបត្តិការនៅក្នុងវិស័យកសិកម្មរវាងប្រទេសទាំងពីរ កាលពីពេលកន្លងទៅ។

ក្នុងជំនួបនៅទីស្តីការក្រសួងកសិកម្ម កាលពីថ្ងៃទី០២ ខែតុលា ឆ្នាំ២០២៣នេះ គីទាំងពីរបានព្រមព្រៀងគ្នាជាគោលការណ៍ ក្នុងការបើកផ្លូវដល់វិនិយោគិនម៉ាឡេស៊ី ដែលមានបំណងចង់មកវិនិយោគលើដំណាំស្វាយ ម្នាស់ និងអំពៅ នៅកម្ពុជា។ ឯកឧត្តមរដ្ឋមន្ដ្រី បានជំរុញដល់វិនិយោគិនម៉ាឡេស៊ី បាញ់ឆ្ពោះទៅកាន់ខ្សែច្រវាក់ផលិតកម្ម និងការនាំចេញ។

ឯកឧត្តម ឌិត ទីណា បញ្ជាក់ប្រាប់ឯកអគ្គរដ្ឋរាជទូតម៉ាឡេស៊ី ថា កសិផលសម្រាប់នាំចេញ អ្នកវិនិយោគម៉ាឡេស៊ី អាចពិចារណាធ្វើកិច្ចសន្យាកសិកម្មជាមួយកសិករខ្មែរ ដើម្បីឱ្យកសិករខ្មែរដាំដុះដំណាំស្របទៅតាមតម្រូវការទីផ្សាររបស់ប្រទេសម៉ាឡេស៊ីបាន៕