ភ្នំពេញ៖ សហភាពអឺរ៉ុប បានគាំទ្រក្រសួងពាណិជ្ជកម្មលើសកម្មភាពគម្រោង «European Union Global Access and Trade Expertise – EU GATE» ដែលផ្តោតលើការបង្កើនភាពប្រកួតប្រជែងរបស់សហគ្រាសធុនតូច និងមធ្យម (SMEs)នៅកម្ពុជា។ នេះជាការលើកឡើងរបស់លោក Koen Everaert អនុប្រធានផ្នែកកិច្ចសហប្រតិបត្តិការនៃសហភាពអឺរ៉ុប និងតំណាងស្ថានទូតអាលឺ្លម៉ង់នៅកម្ពុជា។

ក្នុងកិច្ចពិភាក្សាក្នុងការចាប់ផ្តើមអនុវត្តគម្រោង EUGATE ជាមួយលោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម និងអង្គការ GIZ Cambodia លោក Koen Everaert នឹងគាំទ្រក្រសួងពាណិជ្ជកម្ម និងភាគីពាក់ព័ន្ធរបស់កម្ពុជា លើគោលនយោបាយពាណិជ្ជកម្ម, កិច្ចសម្រួលពាណិជ្ជកម្ម, ការគ្រប់គ្រងហានិភ័យ និងពាណិជ្ជកម្មឌីជីថលក្នុងគម្រោង EUGATE ផងដែរ។ កិច្ចប្រជុំកាលពីថ្ងៃទី៣១ ខែកក្កដា ឆ្នាំ២០២៤ លោកជំទាវ តឹករ៉េត កំរង អរគុណដល់សហភាពអឺរ៉ុប និងរដ្ឋាភិបាលសហព័ន្ធអាល្លឺម៉ង់ ដែលរួមចំណែកអភិវឌ្ឍន៍វិស័យពាណិជ្ជកម្ម និងបានបញ្ជាក់ថាក្រសួងពាណិជ្ជកម្មនឹងផ្តល់កិច្ចសហការយ៉ាងជិតស្និតដើម្បីអនុវត្តគម្រោងថ្មីនេះ។

«EUGATE» ជាគម្រោងមួយក្រោមជំនួយបច្ចេកទេសរបស់សហភាពអឺរ៉ុប និងរដ្ឋាភិបាលសហព័ន្ធអាល្លឺម៉ង់ ដែលបន្តជំរុញការអភិវឌ្ឍពាណិជ្ជកម្ម និងសេដ្ឋកិច្ចប្រកបដោយនិរន្តរភាព តាមរយៈការលើកកម្ពស់ភាពប្រកួតប្រជែងពាណិជ្ជកម្ម ការកសាងស្ថាប័ន ការពង្រឹងសមត្ថភាពពាណិជ្ជកម្មរបស់វិស័យឯកជន និងការកែលម្អបរិយាកាសធុរកិច្ចជាដើម។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី១ ខែសីហា ឆ្នាំ២០២៤៕