ភ្នំពេញ៖ ទន្លេសិប្បនិមិត្តដែលមានឈ្មោះដើមថា «អាងតាវ៉ាន់» ដែលផ្ទុកទឹកបាន ៣លានម៉ែត្រគូប ក្នុងតំបន់បុរីទីប្រជុំជននៃខេត្តត្បូងឃ្មុំ អាចផ្គត់ផ្គង់ទឹកដល់ប្រជាពលរដ្ឋជាង ៥ម៉ឺននាក់។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នៅថ្ងៃទី០២ ខែមិថុនា ឆ្នាំ២០២៤។

ទន្លេសិប្បនិមិត្តនេះ មានផ្ទៃក្រឡា ៤៥,៤ហិកតា ប្រវែង ១៨០០ម៉ែត្រ និងទទឹងជាមធ្យម ៤០០ម៉ែត្រ ដែលជាកន្លែងមានប្រភពទឹកចេញធម្មជាតិ។ បច្ចប្បន្នទន្លេសិប្បនិមិត្តនេះ ក៏បានក្លាយជាប្រភពទឹកដ៏សំខាន់សម្រាប់ផ្គត់ផ្គង់ដល់ប្រជាពលរដ្ឋជាង ៥ម៉ឺននាក់ និងរោងចក្រទឹកស្អាត ១កន្លែង ស្ថិតក្នុងភូមិនិគមលើ ឃុំស្រឡប់ ស្រុកត្បូងឃ្មុំ។

ប្រភពទឹកមួយនេះ ក៏មាន«អាងសោភ័ណ» ដែលមានប្រវែង ១០០០ម៉ែត្រ និងទទឹង ៤០០ម៉ែត្រ សម្រាប់ជួយរំដោះទឹកចេញពីទន្លេសិប្បនិមិត្តក្នុងរដូវវស្សា ជាពេលដែលទឹកពេញទន្លេផងដែរ។ គួរបញ្ជាក់ថា ទន្លេសិប្បនិមិត្ត«អាងតាវ៉ាន់» ត្រូវបានកាយពង្រីកនៅឆ្នាំ២០១៤ និងបានបញ្ចប់ការសាងសង់នៅឆ្នាំ២០១៦៕