ភ្នំពេញ៖ ឯកឧត្តម ម៉ាង ស៊ីណេត អភិបាលខេត្តព្រះសីហនុ ណែនាំឱ្យក្រុមហ៊ុនដឹកជញ្ជូនភ្ញៀវទេសចរតាមនាវា តាមជើងហោះហើរ និងតាមផ្លូវផ្សេងទៀត ផ្សព្វផ្សាយអំពីវប្បធម៌ អរិយធម៌ និងតំបន់កម្សាន្តនានាក្នុងខេត្តដល់ពិភពលោក ដើម្បីទាក់ទាញភ្ញៀវទេសចរបន្ថែមមកកាន់ខេត្តព្រះសីហនុ។

ឯកឧត្តម ម៉ាង ស៊ីណេត ក៏បានជំរុញឱ្យក្រុមហ៊ុនដឹកជញ្ជូនភ្ញៀវទេសចរតាមនាវា តាមជើងហោះហើរ និងតាមផ្លូវផ្សេងទៀត ផ្សព្វផ្សាយពីវិស័យទេសចរណ៍សំខាន់ៗរបស់ខេត្តដល់ភ្ញៀវទេសចរឱ្យបានទូលំទូលាយស្តីអំពីវប្បធម៌ អរិយធម៌នៅតាមក្រុង ស្រុក នៃខេត្តព្រះសីហនុ ដូចជារៀបចំការសម្តែងសិល្បៈ ពិព័រណ៌ផលិតផលវប្បធម៌ ស្វែងយល់ពីសម្បត្តិបេតិកភណ្ឌជាតិ វត្ថុអនុស្សាវរីយនានា និងទទួលរាក់ទាក់ដល់ភ្ញៀវទេសចរផងដែរ។

ក្នុងកិច្ចប្រជុំ «ជំរុញអភិវឌ្ឍន៍វិស័យទេសចរណ៍នៅខេត្តព្រះសីហនុ» នាថ្ងៃទី២៤ ខែធ្នូ ឆ្នាំ២០២៤ ឯកឧត្តម ម៉ាង ស៊ីណេត បានពិភាក្សារិះរកវិធីឱ្យភ្ញៀវស្នាក់នៅខេត្តព្រះសីហនុបានយូរ រកចន្លោះប្រហោងខ្វះខាត ដើម្បីជំរុញការកែលម្អគោលដៅសម្រាប់ការផ្សព្វផ្សាយ ក្នុងគោលដៅចាប់ដៃគូសម្រួលក្នុងការដឹកជញ្ជូនភ្ញៀវ រុញច្រានតំបន់ទេសចរណ៍នៅក្នុងខេត្តព្រះសីហនុ ឱ្យបានផុលផុសបន្ថែមទៀត។ ពាក់ព័ន្ធនឹងការជំរុញទេសចរនេះ ឯកឧត្តម ម៉ាង ស៊ីណេត ណែនាំឱ្យក្រុង ស្រុកនីមួយៗ ផ្សព្វផ្សាយតំបន់ទេសចរណ៍ឱ្យបានទូលំទូលាយ ដើម្បីភ្ញៀវទេសចរអន្តរជាតិ ពិសេសភ្ញៀវទេសចរតាមនាវា និងតាមជើងយន្តហោះ ស្នាក់នៅបានយូរក្នុងខេត្តព្រះសីហនុ៕