ភ្នំពេញ៖ ខេត្តចំនួន៣ មានប្រជាជនជំពាក់បំណុលពីគ្រឹះស្ថានជាសមាជិករបស់ក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី (CBC) ក្នុងប្រទេសកម្ពុជា មានដូចជា រាជធានីភ្នំពេញ ខេត្តកណ្ដាល និងខេត្តសៀមរាប ដែលមានអ្នកខ្ចីលុយច្រើនជាងគេដល់ទៅ ១៣៨,៣២៧,៦១៩លានរៀល ស្មើនឹងជិត ៦០% នៃសមតុល្យឥណទានសរុប។

បើតាមរបាយការណ៍ប្រចាំឆ្នាំ២០២៣ របស់ CBC ចំនួនឥណទាន ១៣៨,៣២៧,៦១៩លានរៀលនេះ នៅរាជធានីភ្នំពេញ មានអ្នកខ្ចីដល់ទៅ ១១៤,៤៩៦,២១៤លានរៀល និងមានសមតុល្យឥណទានចំនួន៤៩,៣% នៃសមតុល្យឥណទានសរុប។ ក្នុងនោះមានអ្នកប្រើប្រាស់ឥណទានសរុបចំនួន ៦៧៦ ពាន់នាក់ និងមានភាគរយអ្នកប្រើប្រាស់ឥណទានសរុបជាស្ត្រីចំនួន ៤៨,២%។

ចំពោះ ខេត្តកណ្តាល មានចំនួនឥណទាន ១៣,១៦៣,៥៩៣លានរៀល ស្មើនឹង៥.៧% នៃសមតុល្យឥណទានសរុប ដែលមានអ្នកប្រើប្រាស់ឥណទានសរុបចំនួន ៣៨៤ពាន់នាក់ និងមានភាគរយអ្នកប្រើប្រាស់ឥណទានសរុបជាស្ត្រី ៥៤%។ រីឯ ខេត្តសៀមរាប មានចំនួនឥណទាន ១០,៦៦៧,៨១២លានរៀល ស្មើនឹង ៤,៦%នៃសមតុល្យឥណទានសរុប ក្នុងនោះមានអ្នកប្រើប្រាស់ឥណទានសរុបចំនួន ៣២៥ ពាន់នាក់ និងមានភាគរយអ្នកប្រើប្រាស់ឥណទានសរុបជាស្ត្រី ៥២,៣%។

គួរបញ្ជាក់ថា គិតត្រឹមឆ្នាំ២០២៣ គ្រឹះស្ថានជាសមាជិករបស់ CBC បានផ្តល់កម្ជីដល់ប្រជាជនចំនួន ២៣២,៣៩៣,៣៩៤ លានរៀល ដែលក្នុងនោះរាជធានីភ្នំពេញ ខេត្តកណ្ដាល និងខេត្តសៀមរាប មានអ្នកខ្ចីលុយច្រើនជាងគេដល់ទៅ១៣៨,៣២៧,៦១៩លានរៀល នៅក្នុង២៥ រាជធានីខេត្ត៕