ភ្នំពេញ៖ មជ្ឈមណ្ឌលអាស៊ាន-ចិន (ACC) នឹងបន្តពង្រឹងកិច្ចសហប្រតិបត្តិការជាមួយកម្ពុជា ក្នុងការជំរុញការនាំយកផលិតផលពីកម្ពុជាចូលទៅកាន់ទីផ្សាររបស់ប្រទេសចិន។ នេះតាមការលើកឡើងរបស់ឯកឧត្តម Shi Zhongjun អគ្គលេខាធិការនៃមជ្ឈមណ្ឌលអាស៊ាន-ចិន (ACC) ក្នុងជំនួបជាមួយឯកឧត្តម លីម ឡោក ពិសិដ្ឋ រដ្ឋលេខាធិការក្រសួងពាណិជ្ជកម្ម។

នៅជំនួបក្នុងកម្មវិធី Çវេទិកាកិច្ចសហប្រតិបត្តិការសេដ្ឋកិច្ចអាស៊ាន-ចិន តំបន់ឆ្នេរសមុទ្រ (Qianhai) ឆ្នាំ២០២៥È ឯកឧត្តម លីម ឡោកពិសិដ្ឋ បានបង្ហាញពីគម្រោងរបស់មជ្ឈមណ្ឌលអាស៊ាន-ចិន ក្នុងការពង្រីកវិសាលភាពវិស័យពាណិជ្ជកម្ម ជាមួយបណ្តាប្រទេសអាស៊ាន ការនាំចេញទំនិញសក្តានុពលពីកម្ពុជាចូលទៅកាន់ទីផ្សារប្រទេសចិន ព្រមទាំងការផ្លាស់ប្តូររវាងប្រជាជន និងប្រជាជន។

ឯកឧត្តម Shi Zhongjun បានកត់សម្គាល់នូវកិច្ចសហប្រតិបត្តិការរវាងក្រសួងពាណិជ្ជកម្ម និងស្ថាប័ន ACC ព្រមទាំងបានលើកឡើងអំពីសារសំខាន់នៃពិធីសារ នៃកិច្ចព្រមព្រៀងពាណិជ្ជកម្មសេរីចិន-អាស៊ាន ៣.០ ដែលជាដំណាក់កាលថ្មីមួយក្នុងកិច្ចសហប្រតិបត្តិការសេដ្ឋកិច្ច និងពាណិជ្ជកម្ម រវាងប្រទេសចិន និងអាស៊ាន។ ឯកឧត្តម លីម ឡោកពិសិដ្ឋ ក៏បញ្ជាក់អំពីយន្តការក្នុងការជំរុញការនាំចេញផលិតផលពីកម្ពុជាទៅកាន់ទីផ្សារអន្តរជាតិ ការភ្ជាប់ទំនាក់ទំនងរវាងវិស័យឯកជន ព្រមទាំងបានជំរុញឱ្យមានការចូលរួមរៀបចំកម្មវិធីព្រឹត្តិការណ៍ពាណិជ្ជកម្មរួមគ្នានៅខេត្តសំខាន់មួយចំនួននៅប្រទេសចិន ដើម្បីតាំងបង្ហាញផលិតផលកម្ពុជា និងជំរុញបង្កើតឱកាសដល់ការនាំចេញផលិតផលពីកម្ពុជាចូលទៅកាន់ទីផ្សារប្រទេសចិនឱ្យកាន់តែច្រើនបន្ថែមទៀត នាពេលខាងមុខ៕