ភ្នំពេញ៖ វិទ្យាស្ថានពាណិជ្ជកម្ម ជឹង គង់ (CKGSB) របស់ប្រទេសចិន ស្នើសុំការណែនាំពីក្រុមប្រឹក្សាអភិវឌ្ឍន៍កម្ពុជា (CDC) លើកិច្ចការងារកម្មសិទ្ធបញ្ញា, ស្ថានភាពទីផ្សារពាណិជ្ជកម្មតាមប្រព័ន្ធអេឡិចត្រូនិច (E-commerce) និងកិច្ចវិនិយោគលើវិស័យថាមពលជាដើម។ នេះជាការលើកឡើងរបស់លោក Jiang YiFei នាយកគ្រប់គ្រងវិទ្យាស្ថាន CKGSB នាថ្ងៃទី២៨ ខែវិច្ឆិកា ឆ្នាំ២០២៤។

ក្នុងកិច្ចពិភាក្សាជាមួយលោក Jiang YiFei ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃCDC ក៏បានលើកឡើងអំពីសុខសន្តិភាព, ស្ថិរភាព, កាលានុវត្តភាពវិនិយោគរបស់កម្ពុជា, វិស័យជាអាទិភាព, ផែនការមេ, កិច្ចសម្របសម្រួលរបស់ក្រុមប្រឹក្សាអភិវឌ្ឍន៍កម្ពុជា, ចក្ខុវិស័យរបស់រាជរដ្ឋាភិបាលកម្ពុជាក្នុងការគាំទ្រធុរកិច្ច និងធានាប្រក្រតីភាពនៃកិច្ចវិនិយោគរបស់វិនិយោគិនផងដែរ។

ក្នុងជំនួបនេះដដែល លោក Jiang YiFei ក៏បានពិនិត្យអំពីភាពរីកចម្រើនយ៉ាងឆាប់រហ័សរបស់កម្ពុជា ពិសេសលើការអភិវឌ្ឍផ្នែកបច្ចេកវិទ្យា ដែលនឹងអាចឈានទៅមានសមត្ថភាពពេញលេញនាពេលឆាប់ៗខាងមុខនេះទៀតផង៕