ភ្នំពេញ៖ សភាពាណិជ្ជកម្មកម្ពុជា និងក្រុមហ៊ុន Hoa Binh Group របស់វៀតណាម ស្វែងយល់ដោយផ្ទាល់ សម្រាប់កិច្ចសហប្រតិបត្តិការរួមគ្នា ជាពិសេសដើម្បីពង្រឹងចំណងសេដ្ឋកិច្ច ជំរុញពាណិជ្ជកម្ម និងការវិនិយោគទ្វេភាគី ព្រមទាំងស្វែងរកទីផ្សារកាន់តែទូលំទូលាយសម្រាប់ ផលិតផលកម្ពុជា។

ក្នុងដំណើរធ្វើទស្សនកិច្ចនៅក្រុមហ៊ុនខាងលើ នាទីក្រុងហូជីមីញ ប្រទេសវៀតណាម កាលពីថ្ងៃទី១៥ ខែកក្កដា ឆ្នាំ២០២៥ នេះ ត្រូវបានដឹកនាំដោយ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា ពិភាក្សាជាមួយ លោក ឡេ វៀត ហៃ (Le Viet Hieu) ប្រធានក្រុមហ៊ុនសំណង់ហាវប៊ិញគ្រុប និងមានការចូលរួមពីសមាជិកសភាពាណិជ្ជកម្មកម្ពុជាប្រមាណ ៣០រូបផងដែរ។

គួរបញ្ជាក់ថា ក្រុមហ៊ុន Hoa Binh Group ជាក្រុមហ៊ុនសំណង់ដ៏ធំមួយ នៅប្រទេសវៀតណាម ដែលមានជាង ៥០០គម្រោង ទូទាំង ៦ប្រទេស ក្នុងពិភពលោក រួមទាំងនៅប្រទេសកម្ពុជាផងដែរ។ នេះបើតាមការចុះផ្សាយរបស់ សភាពាណិជ្ជកម្មកម្ពុជា៕