ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំវគ្គបណ្តុះបណ្តាលស្តីពី «សុវត្ថិភាពអាហារ និងអនាម័យ លើកទី២» ដើម្បីរួមចំណែកឆ្លើយតបនឹងការរីកចម្រើននៃឧស្សាហកម្មអាហាររបស់កម្ពុជា និងជំរុញការនាំចេញ តាមគម្រោងមជ្ឍមណ្ឌលបច្ចេកវិទ្យាកែច្នៃអាហារ កម្ពុជា-កូរ៉េ (FTC) នៅថ្ងៃទី១២ ខែឧសភា ឆ្នាំ២០២៦។ 

ក្នុងឱកាសនោះ ឯកឧត្តម ហុង រ៉ាដា អនុរដ្ឋលេខាធិការក្រសួងឧស្សាហកម្ម និងជាប្រធានគម្រោង FTC បានសង្កត់ធ្ងន់ថា ការធានាសុវត្ថិភាព និងអនាម័យផលិតផលអាហារ គឺជាគន្លឹះដ៏សំខាន់ក្នុងការលើកកម្ពស់សុខុមាលភាពសាធារណៈ និងកសាងទំនុកចិត្តរបស់អ្នកប្រើប្រាស់។ 

លោកបណ្ឌិត Kim Young Chan ប្រធានគម្រោងភាគីកូរ៉េ ក៏បានលើកទឹកចិត្តឱ្យម្ចាស់សហគ្រាសមកប្រើប្រាស់ឧបករណ៍ និងប្រឹក្សាបច្ចេកទេសនៅមជ្ឈមណ្ឌល FTC ដើម្បីប្រែក្លាយចំណេះដឹងទៅជាការអនុវត្តផ្ទាល់ផងដែរ៕