ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ ស្នើឱ្យក្រុមហ៊ុនអាកាសចរណ៍ Asiana Airlines ពិនិត្យលទ្ធភាពពង្រីកបន្ថែមទៀតនូវការហោះហើរត្រង់មកខេត្តសៀមរាប និងខេត្តព្រះសីហនុ ដើម្បីផ្តល់ភាពងាយស្រួលមួយកម្រិតទៀតដល់ប្រជាជន និងវិនិយោគិនកូរ៉េ ព្រមទាំងអន្តរជាតិ ធ្វើដំណើរមកកម្ពុជា។

ក្នុងកិច្ចពិភាក្សា ជាមួយ លោក Park Jongman អគ្គនាយករងប្រតិបត្តិ និងជាប្រធានផ្នែកកិច្ចការអ្នកដំណើររបស់ក្រុមហ៊ុនអាកាសចរណ៍ Asiana Airline ឯកឧត្តមរដ្ឋមន្រ្តីក្រសួងទេសចរណ៍ ក៏បានអរគុណ និងវាយតម្លៃខ្ពស់ចំពោះការចូលរួមចំណែករបស់ក្រុមហ៊ុន លើសេវាកម្មដឹកជញ្ជូនអ្នកដំណើរ និងអ្នកទេសចរតាមផ្លូវអាកាសរវាងកម្ពុជា និងកូរ៉េ ប្រកបដោយផាសុកភាព និងសុវត្ថិភាពខ្ពស់រហូតមក។ បើតាមការចុះផ្សាយរបស់ក្រសួងទេសចរណ៍ នាថ្ងៃទី៩ ខែមិថុនា ឆ្នាំ២០២៥ ជំនួបពិភាក្សាពីកិច្ចសហប្រតិបត្តិការទេសចរណ៍កម្ពុជា-កូរ៉េ របស់ភាគីទាំងពីរនេះដែរ គឺបានធ្វើឡើងនៅពន្លារបស់ក្រសួងទេសចរណ៍៕