ភ្នំពេញ៖ ការធ្វើកិច្ចសហប្រតិបត្តិការទ្វេភាគីរវាងធនាគារកណ្តាល នឹងក្លាយជាឱកាសក្នុងការជួយគ្នាទៅវិញទៅមកនៅពេលមានវិបត្តិ និងជាពិសេសអាចជួយពង្រឹងស្ថិរភាពហិរញ្ញវត្ថុក្នុងតំបន់។ នេះបើតាមការលើកឡើងរបស់ លោក ឡុង វីបុណ្យឫទ្ធ អគ្គនាយករងប្រតិបត្តិការ ធនាគារជាតិនៃកម្ពុជា ក្នុងសន្និបាតស្តីពីភាពធន់នៃទុនបម្រុងអន្តរជាតិ លើកទី១ ដែលរៀបចំដោយធនាគារកណ្តាលឥណ្ឌា ក្រោមប្រធានបទ «កិច្ចសហប្រតិបត្តិការទ្វេភាគីរវាងបណ្តាធនាគារកណ្តាល»។

ក្នុងកិច្ចពិភាក្សា ដែលធ្វើឡើងនៅទីក្រុង Mumbai ប្រទេសឥណ្ឌា កាលពីថ្ងៃទី៦ ខែមីនា ឆ្នាំ២០២៦ លោក ឡុង វីបុណ្យឫទ្ធ ក៏បានមានប្រសាសន៍ពីការវិវត្តនៃនិន្នាកាសកល និងការធ្វើពិពិធកម្មទ្រព្យសកម្មនិងរូបិយប័ណ្ណ ដែលក្នុងនោះលោកសង្កេតឃើញពីកំណើននៃការធ្វើពិពិធកម្មទៅវិនិយោគមាស ទ្រព្យសកម្មជាប្រាក់អឺរ៉ូ និងប្រាក់យ៉ន់ចិន ខណៈវិនិយោគិនខ្លះទៀតនៅមិនទាន់មានជំហរច្បាស់លាស់នៅឡើយ។

លោក ឡុង វីបុណ្យឫទ្ធ ក៏បានចូលរួមជាមតិមួយចំនួនទាក់ទងនឹងការគ្រប់គ្រងទុនបម្រុងអន្តរជាតិ រួមមាន៖ ស្នើឱ្យធនាគារកណ្តាលក្នុងតំបន់ងាកមកធ្វើពិពិធកម្មទ្រព្យសកម្មក្នុងតំបន់, សិក្សាស្រាវជ្រាវលើប្រធានបទរួមស្តីពី (១) ការវិនិយោគក្នុងតំបន់លើសញ្ញាបណ្ណបៃតង និងសញ្ញាបណ្ណសង្គម (២) ប្រើប្រាស់បញ្ញាសិប្បនិម្មិត (AI) ដើម្បីជំនួយការងារគ្រប់គ្រងទុនបម្រុង (៣) អភិវឌ្ឍន៍ក្របខណ្ឌសម្រាប់គ្រប់គ្រងហានិភ័យ និងបង្កើតក្រុមការងារជំនាញដើម្បីសិក្សានិងជំរុញការងារនេះ និងប្រធានបទផ្សេងទៀតដែលជាចំណាប់អារម្មណ៍រួម៕