ភ្នំពេញ៖ ឯកឧត្តម ហឺ លីហ្វឹង (He Lifeng) ឧបនាយករដ្ឋមន្ត្រីនៃចិន បានលើកទឹកចិត្តឱ្យមានការវិនិយោគបន្ថែមទៀតពីប្រទេសចិនមកកម្ពុជា និងវាយតម្លៃខ្ពស់ចំពោះការវិនិយោគចិនដែលជាប្រភពទុនវិនិយោគធំជាងគេរបស់កម្ពុជាផងដែរ។

ការលើកទឹកចិត្តរបស់ឯកឧត្តម He Lifeng នេះ ធ្វើឡើងក្នុងជំនួបពិភាក្សាជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៨ ខែកញ្ញា ឆ្នាំ២០២៥ មុនចូលរួមពីធីបើកជាផ្លូវការពិព័រណ៍អន្តរជាតិចិនលើកទី២៥ សម្រាប់ការវិនិយោគ និងពាណិជ្ជកម្ម (CIFIT)។

ឯកឧត្តម He Lifeng បានលើកឡើងថា CIFIT ជាវេទិកាមួយដែលទទួលការយកចិត្តទុកដាក់ខ្ពស់ពីឯកឧត្តមប្រធានាធិបតី ស៊ី ជីនពីង (Xi Jinping) ដែលឯកឧត្តមប្រធានាធិបតីផ្ទាល់ធ្លាប់បំពេញតួនាទីជាប្រធានគណៈកម្មាធិការរៀបចំ CIFIT នៅពេលឯកឧត្តមជាអភិបាលខេត្តហ្វូជៀន នៅអំឡុងឆ្នាំ១៩៩៩-២០០២។ ឯកឧត្តម ស៊ុន ចាន់ថុល បានលើកឡើងថា CIFIT មិនត្រឹមតែជាវេទិកាសម្រាប់ជំរុញវិនិយោគ និងពាណិជ្ជកម្មប៉ុណ្ណោះទេ ថែមទាំងជាក្បាលម៉ាស៊ីននៃនវានុវត្តន៍ដែលនឹងជំរុញឱ្យមានការបង្កើតការងារ៕