ភ្នំពេញ៖ កម្ពុជា ទទួលបានចំណូលពីវិស័យយានយន្តនិងគ្រឿងចក្រមានចំនួន ៣១,១% នៃចំណូលសរុបដែលអគ្គនាយកដ្ឋានគយ និងរដ្ឋាករកម្ពុជា ប្រមូលបានក្នុងឆ្នាំ២០២៣ មានចំនួន ៩ ២៦៧,៤៨ ប៊ីលានរៀល ស្មើនឹងប្រមាណ ២ ២៨៨,២៧លានដុល្លារ ថយចុះ១៥,៧% បើធៀបនឹងរយៈពេលដូចគ្នាឆ្នាំ២០២២។

បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី១៦ ខែកុម្ភៈ ឆ្នាំ២០២៤នេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបាន ៨២,៤% នៃផែនការដែលកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ ការប្រមូលចំណូលពុំបានសម្រេចតាមផែនការនេះ បណ្ដាលមកពីកត្តាប្រឈមធំៗមួយចំនួនដូចជា៖ ការធ្លាក់ចុះទីផ្សារមុខទំនិញយានយន្តដែលកន្លងមកជាប្រភពចំណូលសំខាន់របស់ អគរ, កំណើនជាបន្តបន្ទាប់ទាំងវិសាលភាពនិងភាពស៊ីជម្រៅនៃការអនុវត្តកិច្ចព្រមព្រៀងពាណិជ្ជកម្មសេរី, ការរីកលូតលាស់នៃផលិតកម្មក្នុងស្រុកជំនួសការនាំចូល និងការកើតមាននូវសកម្មភាពរត់គេចពន្ធដែលកាន់តែស្មុគស្មាញនិងជ្រកក្រោមរូបភាពថ្មីៗជាដើម។

គួរបញ្ជាក់ថា ប្រភេទពន្ធនិងអាករ ដែលប្រមូលចំណូលបានក្នុងឆ្នាំ២០២៣ មាន៖ អាករលើតម្លៃបន្ថែមមានចំនួន៤១,២% នៃចំណូលសរុប, អាករពិសេសមានចំនួន៣០,៣% នៃចំណូលសរុប, ពន្ធគយមាន ២១% នៃចំណូលសរុប, អាករបន្ថែមលើផលិតផលប្រេងឥន្ធនៈមាន ៤,៣% នៃចំណូលសរុប និងអាករនាំចេញនិងកម្រៃផ្សេងៗមាន១,៨% នៃចំណូលសរុប។ ចំពោះ ចំណូលតាមក្រុមទំនិញឃើញថា ក្រុមទំនិញចម្រុះមាន៣៥,៣% នៃចំណូលសរុប, យានយន្តនិងគ្រឿងចក្រមាន ៣១,១% នៃចំណូលសរុប, ប្រេងឥន្ធនៈ និងថាមពលមាន ២៦,៦% នៃចំណូលសរុប, សម្ភារសំណង់ និងកម្រៃផ្សេងៗ មាន ៧% នៃចំណូលសរុប៕