ភ្នំពេញ៖ កម្ពុជា-បារាំង បានចុះអនុស្សរណៈយោគយល់ (MOU) ចំនួន០៦ ដើម្បីជំរុញការអភិវឌ្ឍសេដ្ឋកិច្ចកម្ពុជា និងប្រទេសនិយាយភាសាបារាំង ពិសេស ជួយគាំទ្រដល់ធុរកិច្ចប្រទេសនិយាយភាសាបារាំង តាមរយៈការរៀបចំជំនួបពាណិជ្ជកម្ម សន្និសីទ សិក្ខាសាលា និងព្រឹត្តិការណ៍ធុរកិច្ចផ្សេងៗទៀត។

តាមការចុះផ្សាយរបស់សម្តេចធិបតី ហ៊ុន ម៉ាណែត កាលពីថ្ងៃទី ១៦ ខែមករា ឆ្នាំ២០២៤ ការចុះ MOU ចំនួន ០៦ រួមមាន៖ ១. អនុស្សរណៈយោគយល់រវាង សភាពាណិជ្ជកម្មកម្ពុជា និងសម្ព័ន្ធនិយោជកហ្វ្រង់កូហ្វូន (APF), ២. អនុស្សរណៈយោគយល់រវាង ក្រុមហ៊ុនរ៉ូយ៉ាល់គ្រុប និងក្រុមហ៊ុន Blue Circle, ៣. អនុស្សរណៈយោគយល់រវាង អាកាសយានដ្ឋានអន្តរជាតិតេជោ (OCIC) និង ក្រុមហ៊ុន Lagardere Travel Retail។

ចំណែក អនុស្សរណៈយោគយល់ទី៤ គឺការអនុស្សរណៈយោគយល់រវាងក្រុមហ៊ុន OCIC និង Aloest Productions, ៥. អនុស្សរណៈយោគយល់រវាង ក្រុមហ៊ុន OCIC និង Platform Impact តំណាងដោយក្រុមហ៊ុន Ecole 42, និង៦. អនុស្សរណៈយោគយល់រវាង LYP គ្រុប និងក្រុមហ៊ុន SEMMARIS។ ការផ្សាយដដែល បានឱ្យដឹងថា គណៈប្រតិភូពាណិជ្ជកម្មកម្ពុជា នឹងបំពេញទស្សនកិច្ចក្រុមហ៊ុនបារាំង ដើម្បីកសាងទំនាក់ទំនង និងពង្រីកសកម្មភាពពាណិជ្ជកម្មរវាងប្រទេសទាំងពីរ៕