ភ្នំពេញ៖ រដ្ឋបាលខេត្តរតនគិរី និងមន្ទីរទេសចរណ៍ខេត្ត សហការរៀបចំពិធីបើកព្រឹត្តិការណ៍ «សម្លចាណាងឆ្នាំងយក្ស» លើកទី១ ឆ្នាំ២០២៥ ក្នុងគោលបំណងលើកស្ទួយមុខម្ហូបរបស់ជនជាតិដើមភាគតិច ខេត្តរតនគិរី ព្រមទាំងជំរុញចលនាភ្ញៀវទេសចរជាតិ នារដូវកាលបៃតង តំបន់ភូមិភាគឦសាន្តខេត្តរតនគិរី។

កម្មវិធី ដែលនឹងរៀបចំនៅថ្ងៃទី៣០ ខែមិថុនា ឆ្នាំ២០២៥ វេលាម៉ោង ២៖៣០នាទីរសៀល នៅបរិវេណគ្រួសារដំរី មាត់បឹងកន្សែង ក្រុងបានលុងនេះ នឹងមានការដាក់តាំងបង្ហាញនូវសម្លចាណាង ដើម្បីភ្លក់រស់ជាតិដើមដោយសេរី, ការសម្តែងនូវសិល្បៈរបាំប្រពៃណី របស់បងប្អូនជនជាតិដើមភាគតិច, ការប្រគុំតន្ត្រី និងកម្មវិធីសប្បាយៗ រួមទាំងការដាក់តាំងបង្ហាញនូវផលិតផលផ្លែឈើជាច្រើន ប្រភេទរបស់ខេត្តរតនគិរី។ នេះបើតាមការចុះផ្សាយរបស់ មន្ទីរទេសចរណ៍ខេត្តរតនគិរី៕