ភ្នំពេញ៖ វេទិកាធុរកិច្ចអឺរ៉ុប-កម្ពុជា ដែលរៀបចំដោយសភាពាណិជ្ជកម្មកម្ពុជា មានក្រុមហ៊ុន១១០ ចូលរួម ក្នុងនោះក្រុមហ៊ុនចំនួន៨០ មកពីប្រទេសបារាំង និង ៣០ក្រុមហ៊ុនមកពីប្រទេសកម្ពុជា។ ការចូលរួមនេះ គឺដើម្បីធ្វើការផ្លាស់ប្តូរទំនាក់ទំនង ពង្រីកឱកាស និងសិក្សាស្វែងយល់អំពីការបង្កើតឱកាសវិនិយោគនៅកម្ពុជា។

តាមការចុះផ្សាយរបស់សម្តេចធិបតី ហ៊ុន ម៉ាណែត នៅថ្ងៃទី១៥ ខែមករា ឆ្នាំ២០២៤ វេទិកាធុរកិច្ចនេះ ឆ្លុះបញ្ចាំងអំពីការពង្រឹងទំនាក់ទំនងទ្វេភាគីរវាងកម្ពុជា និងសហភាពអឺរ៉ុប ដោយឈរលើគោលការណ៍គោរពគ្នាទៅវិញទៅមក, ការផ្ដល់ផលប្រយោជន៍ឱ្យគ្នា និងគុណតម្លៃរួមគ្នា ពិសេសលើកកម្ពស់កាលានុវត្តភាពធុរកិច្ច, ការវិនិយោគ, ពាណិជ្ជកម្ម និងពង្រឹងទំនាក់ទំនងសេដ្ឋកិច្ចរវាងភាគីទាំងពីរ៕