ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចណ៍ ស្នើឱ្យម្ចាស់សណ្ឋាគារ និងម្ហូបអាហាររួមគ្នាបញ្ចុះតម្លៃស្នាក់នៅ ព្រមទាំងពង្រឹងបដិសណ្ឋារកិច្ចឱ្យល្អ និងកក់ក្តៅ ដើម្បីទទួលភ្ញៀវទេសចរជាតិ និងអន្តរជាតិនៅក្នុងរដូវកាលបៃតង (Green Season)។ នេះបើតាមការចុះផ្សាយរបស់ក្រសួងទេសចណ៍ នាថ្ងៃទី០៨ ខែឧសភា ឆ្នាំ២០២៥។

ជាមួយគ្នានេះ ឯកឧត្តម ហួត ហាក់ បានលើកឡើងថា ការចូលរួមពីវិស័យឯកជន ក្រុមអ្នកផលិតមាតិកាទេសចរណ៍កម្ពុជា នឹងទទួលបាននូវធាតុចូលល្អៗកាន់តែច្រើនបន្ថែមទៀត ដើម្បីដាក់បញ្ចូលក្នុងយុទ្ធសាស្ត្រទាក់ទាញភ្ញៀវទេសចរនៅក្នុងរដូវកាលបៃតង (Green Season) ឱ្យមានកំណើនបន្ថែមលើសពីការរំពឹងទុក។

លើសពីនេះ រដ្ឋមន្រ្តីក្រសួងទេសចរណ៍ ក៏បានជំរុញឱ្យរួមគ្នាបង្កើតព្រឹត្តិការណ៍ទេសចរណ៍នានានៅតាមបណ្តារាជធានីខេត្ត ដោយត្រូវរៀបចំជាលក្ខណៈយុទ្ធសាស្ត្រ និងប្រកបដោយភាពច្នៃប្រឌិត និងមានអត្តសញ្ញាណវប្បធម៌ខ្មែរ ពិសេសកិច្ចសហការឱ្យបានសកម្ម និងផុសផុលពីបណ្តាភាគីពាក់ព័ន្ធទាំងអស់ ដើម្បីរួមគ្នាសម្រេចឱ្យបាននូវកំណើនភ្ញៀវទេសចរបន្ថែមទៀតនាឆ្នាំ២០២៥៕