ភ្នំពេញ៖ ប្រតិភូវិនិយោគិនចិន បានជួបពិភាក្សាការងារជាមួយថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា (CDC) ដោយបង្ហាញគោលបំណងសិក្សាពីសក្ដានុពលវិនិយោគ, កាលានុវត្តភាពវិនិយោគ និងស្វែងយល់បន្ថែមអំពីព័ត៌មានទាក់ទងនឹងបទប្បញ្ញត្តិពាក់ព័ន្ធនឹងវិស័យយានយន្តនៅកម្ពុជា ដើម្បីសម្រេចចិត្តបណ្ដាក់ទុនវិនិយោគបង្កើតរោងចក្រដំឡើងរថយន្ត។

ក្នុងជំនួបនេះ កាលពីថ្ងៃទី២២ ខែធ្នូ ឆ្នាំ២០២៣ ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា បានជំរុញសកម្មភាពវិនិយោគិនចិនក្នុងវិស័យយានយន្ត និងផ្តល់យន្តការកិច្ចសម្រួលការវិនិយោគបរទេស និងក្នុងស្រុក ដែលមានចែងក្នុងច្បាប់ស្ដីពីវិនិយោគនៃកម្ពុជា។ 

ជាមួយគ្នានេះ មន្ត្រីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា បានលើកឡើងអំពីផែនទីបង្ហាញផ្លូវអភិវឌ្ឍន៍វិស័យយានយន្ដនិងអេឡិចត្រូនិកនៅកម្ពុជា ដែលជាឧបករណ៍សម្រាប់វិនិយោគិនស្វែងយល់អំពីសក្ដានុពលរបស់វិស័យយានយន្ត និងអេឡិចត្រូនិកក្នុងបរិបទនៃការអភិវឌ្ឍនៅកម្ពុជា, បញ្ហាប្រឈមនិងវិធានការគន្លឹះ ដើម្បីដោះស្រាយបញ្ហា។ 

ក្នុងនោះដែរ មន្ត្រីជាន់ខ្ពស់របស់ CDC បានលើកទឹកចិត្តឱ្យវិនិយោគិនចិនពិនិត្យលទ្ធភាព ដើម្បីដាក់ពាក្យស្នើសុំវិនិយោគឱ្យបានឆាប់ និងទទួលបាននូវអត្ថប្រយោជន៍ពីកញ្ចប់លើកទឹកចិត្តដែលស្របតាមច្បាប់ជាធរមាននៅកម្ពុជា៕