ភ្នំពេញ៖ ក្រុមហ៊ុនមូលបត្រ ភីភី លីង ឯ.ក និងធនាគារ អេស៊ីលីដា ភីអិលស៊ី បានចុះហត្ថលេខាស្តីពីកិច្ចព្រមព្រៀងសហប្រតិបត្តិការបង្កើននូវទំនុកចិត្តដល់វិនិយោគិន និងលើកកម្ពស់សេវាហិរញ្ញវត្ថុ សម្រាប់វិនិយោគិនបរទេស ដែលអនុញ្ញាតឱ្យវិនិយោគិនបរទេសទទួលបានសេវាឥណទាន ដើម្បីជួញដូរឧបករណ៍និស្សន្ទក្នុងវិស័យមូលបត្រនៅកម្ពុជា។ នេះបើយោងតាមការចុះផ្សាយរបស់និយ័តករមូលបត្រកម្ពុជា នាថ្ងៃទី០៤ ខែមេសា ឆ្នាំ២០២៥។

ក្នុងពីធីចុះកិច្ចព្រមព្រៀងនេះ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានលើកឡើងថា ការសហការរវាងក្រុមហ៊ុនមូលបត្រ ភីភី លីង និងធនាគារ អេស៊ីលីដា គឺបានផ្តល់នូវយន្តការថ្មីមួយដល់វិនិយោគិនក្នុងការទទួលបានជម្រើសនៃសេវាឥណទានវិនិយោគលើឧបករណ៍ហិរញ្ញវត្ថុ បង្កើននូវទំនុកចិត្ត ពិសេសទាក់ទាញវិនិយោគិនបរទេសឱ្យចូលរួមវិនិយោគក្នុងវិស័យមូលបត្រនៅកម្ពុជា។

គួរបញ្ជាក់ថា កម្មវិធីខាងលើនេះ មានការចូលរួមពីលោកបណ្ឌិត RAYMOND CHOI ទីប្រឹក្សាក្រុមប្រឹក្សាភិបាល នៃក្រុមហ៊ុនមូលបត្រ ភីភី លីង ឯ.ក, លោក នេត ពិសិដ្ឋ នាយកប្រតិបត្តិសេវាហិរញ្ញវត្ថុនៃធនាគារ អេស៊ីលីដា ភីអិលស៊ី, លោក ជា សុធា អភិបាលនៃក្រុមហ៊ុនមូលបត្រ ភីភី លីង ឯ.ក, តំណាងផ្សារមូលបត្រ កម្ពុជា, ប្រធានសមាគមឈ្មួញជើងសាឧបករណ៍និស្សន្ទកម្ពុជា, ប្រធានសមាគមអ្នកវិនិយោគកម្ពុជា និងវិនិយោគិនសក្តានុពល៕