ភ្នំពេញ៖ ឯកឧត្តម TAKAHASHI FUMIAKI អតីតឯកអគ្គរាជទូតជប៉ុនប្រចាំកម្ពុជា និងជាប្រធានសមាគមជប៉ុន-កម្ពុជា(JCA) បានលើកឡើងថា នាខែវិច្ឆិកាខាងមុខនេះ ប្រតិភូមួយក្រុមមកកាន់ប្រទេសកម្ពុជា ដើម្បីបង្កឱកាសសម្រាប់វិនិយោគិនជប៉ុន ក្នុងការសិក្សាអំពីសក្តានុពលផ្សេងៗដែលកម្ពុជាមាន សម្រាប់វិនិយោគ។

នាជំនួបនៅទីស្តីការក្រសួងមហាផ្ទៃ ឯកឧត្តមអភិសន្តិបណ្ឌិត ស សុខា បានបញ្ជាក់ថា កម្ពុជាត្រៀមខ្លួនជានិច្ចក្នុងការផ្តល់កិច្ចសហការសម្របសម្រួលជំរុញ និងលើកកម្ពស់បរិយាកាស នៃការវិនិយោគ ដើម្បីធានាជួយទាក់ទាញវិនិយោគិនជប៉ុនមកកម្ពុជា និងវិនិយោគិនមកពីប្រទេសផ្សេងៗផងដែរ។

ឯកឧត្តម ស សុខា បានបន្តថា ក្រសួងមហាផ្ទៃ កំពុងអនុវត្តតួនាទី និងភារកិច្ចថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដែលការងារនេះ ក៏ត្រូវការកិច្ចសហការជាមួយភាគីពាក់ព័ន្ធរួមទាំងវិស័យឯកជនផងដែរ។ ក្នុងជំនួបនោះផងដែរ ឯកឧត្តម ស សុខា ជាមួយឯកឧត្តម TAKAHASHI FUMIAKI បានវាយតម្លៃខ្ពស់ចំពោះកិច្ចសហប្រតិបត្តិការកន្លងមករបស់ភាគីទាំងពីរ ដូចជា វិស័យសេដ្ឋកិច្ច នយោបាយ និងសន្តិសុខ។ នេះបើតាមការចុះផ្សាយរបស់ក្រសួងមហាផ្ទៃ កាលពីថ្ងៃទី០៤ ខែមេសា ឆ្នាំ២០២៥៕