ភ្នំពេញ៖ សម្តេចធិបតីនាយករដ្ឋមន្រ្តី ហ៊ុន ម៉ាណែត បានជួបសន្ទនាផ្ទាល់ជាមួយប្រជាកសិករម្នាក់ ដែលប្រកបរបរដាំដំណាំកៅស៊ូ ក្នុងទំហំផ្ទៃដី ១ហិកតា និងស្វាយចន្ទី លើផ្ទៃដី ១ហិកតា នៅតាមបណ្ដោយផ្លូវជាប់ព្រំដែន ក្នុងគម្រោងអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម (CLV)។

កសិករម្នាក់ដែលកំពុងបង់ត្រីនៅតាមបណ្ដោយផ្លូវជាប់ព្រំដែននោះ បានលើកឡើងថា ក្នុងរយៈពេល ៨ឆ្នាំដែលគាត់ដាំដំណាំកៅស៊ូនេះ គឺបានជាជ័រកៅស៊ូចំនួន ៣ឆ្នាំមកហើយ។ កសិករ ក៏បានបញ្ជាក់ប្រាប់សម្តេចធិបតី ហ៊ុន ម៉ាណែត ពីការសប្បាយចិត្តរបស់គាត់ ដែលឆ្នាំនេះកៅស៊ូបានឡើងថ្លៃល្អ និងឆ្នាំកន្លងទៅទាំងកៅស៊ូ និងស្វាយចន្ទីក៏បានតម្លៃល្អសម្រាប់គាត់ផងដែរ។

សម្តេចធិបតី ហ៊ុន ម៉ាណែត បានសរសេរសំណេរនៅលើគណនីហ្វេសប៊ុករបស់សម្តេចយ៉ាងដូច្នេះថា៖ «កសិករម្នាក់នេះបានប្រើយុទ្ធសាស្ត្រពិពិធកម្មសេដ្ឋកិច្ច ដោយដាំទាំងដំណាំកៅស៊ូ និងស្វាយចន្ទី ក្នុងករណីដំណាំមួយធ្លាក់ថ្លៃនៅឆ្នាំខ្លះ ក៏អាចមានដំណាំមួយទៀតនៅទប់ទល់បាន»។

សូមជម្រាបថា ក្រសួងពាណិជ្ជកម្ម បានបង្ហាញនូវឯកសារពាក់ព័ន្ធនឹងគម្រោងអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម (CLV) តាមរយៈតំណភ្ជាប់ https://www.moc.gov.kh/document-category/official-document កាលពីថ្ងៃទី២ ខែសីហា ឆ្នាំ២០២៤។ ការបង្ហាញជាសាធារណៈនេះ គឺដើម្បីឱ្យសាធារណជនស្វែងយល់បានច្បាស់អំពីអត្ថន័យ ខ្លឹមសារ និងអត្ថប្រយោជន៍នៃកិច្ចសហប្រតិបត្តិការ ដែលជួយដល់ការរីកចម្រើនសេដ្ឋកិច្ច-សង្គម និងរួមចំណែកលើកស្ទួយជីវភាពប្រជាជនក្នុងតំបន់CLV ឱ្យកាន់តែប្រសើរឡើង៕