ភ្នំពេញ៖ ព្រឹត្តិបត្រស្រាវជ្រាវអេឡិចត្រូនិក (iTrade Bulletin) វ៉ុល០១ លេខ០១ ជាភាសាខ្មែរ និងអង់គ្លេស សម្រាប់ខែកុម្ភៈ ឆ្នាំ២០២៥ របស់ក្រសួងពាណិជ្ជកម្ម បានឱ្យដឹងថា ការចុះបញ្ជីក្រុមហ៊ុន នឹងធ្វើឱ្យម្ចាស់អាជីវកម្ម ទទួលបានការគាំពារតាមផ្លូវច្បាប់ និងជួយសម្រួលដល់ការទទួលកម្ចីប្រាក់ពីធនាគារនិងការវិនិយោគពីវិនិយោគិន។

ជាមួយគ្នានេះ ក្រុមហ៊ុន ដែលចុះបញ្ជី នឹងទទួលបានការទាក់ទាញអតិថិជន (ក្រុមហ៊ុនធំ) ដែលបញ្ជាទិញក្នុងទំហំធំ ព្រោះគ្មានក្រុមហ៊ុនធំណាចង់រកស៊ីជាមួយអាជីវកម្ម ដែលមិនចុះបញ្ជីនោះទេ។ បន្ថែមពីនេះ ម្ចាស់អាជីវកម្ម នឹងទទួលបានអត្ថប្រយោជន៍ផ្សេងៗសម្រាប់និយោជិតរបស់អ្នកពីបេឡាជាតិ សន្តិសុខសង្គម, បង្កើតរអត្តសញ្ញាណផ្ទាល់ខ្លួនសម្រាប់អាជីវកម្ម, បំពេញកាតព្វកិច្ចជាពលរដ្ឋក្រោមច្បាប់ និងបទប្បញ្ញត្តិកម្ពុជា និងជៀសវាងការផាកពិន័យផ្សេងៗ និងការតម្រូវឱ្យបិទទ្វារអាជីវកម្មផងដែរ៕