ភ្នំពេញ៖ អាកាសចរណ៍អន្តរជាតិធំៗពីរ រួមមានអាកាសចរណ៍ Emirates Airlines និងអាកាសចរណ៍ Turkey Airlines នឹងបង្កើនជើងហោះហើរបន្ថែមមកកាន់ខេត្តសៀមរាប និងទីក្រុងភ្នំពេញ ក្នុងឆ្នាំ២០២៥ នេះ។ នេះបើតាមការចុះផ្សាយរបស់ សម្តេចធិបតី ហ៊ុន ម៉ាណែត នាថ្ងៃទី៤ ខែមីនា ឆ្នាំ២០២៥។

ចំពោះអាកាសចរណ៍ Emirates Airlines នឹងហោះពីទីក្រុង ឌូបៃ មកកាន់ខេត្តសៀមរាប ដែលចាប់ផ្តើមនៅខែមិថុនា ដោយប្រើយន្តហោះខ្នាតធំ boeing 777 300er និងអាកាសចរណ៍ Turkey Airlines នឹងហោះពីទីក្រុង អ៊ីស្តង់ប៊ុល ប្រទេសតួគី មកភ្នំពេញ ដែលចាប់ផ្តើមនៅខែធ្នូ ឆ្នាំ២០២៥ ដោយប្រើយន្តហោះខ្នាតធំ Airbus A330 ឬ Boeing 777។

ពាក់ព័ន្ធនឹងការបង្កើនការដឹកជញ្ជូនតាមផ្លូវអាកាសនេះ សម្តេចធិបតី ហ៊ុន ម៉ាណែត ចាត់ទុកថា ជាកត្តាផលិតកម្មយុទ្ធសាស្ត្រមួយដ៏សំខាន់ នៃដំណើរការអភិវឌ្ឍន៍សេដ្ឋកិច្ច-សង្គម តាមរយៈការសម្រួលដល់ការធ្វើដំណើរ ការដឹកជញ្ជូនទំនិញ ក្នុងរយៈពេលខ្លីនិងសុវត្ថិភាពខ្ពស់ ការជំរុញសកម្មភាពពាណិជ្ជកម្ម និងទេសចរណ៍ ការលើកកម្ពស់ទំនាក់ទំនងសង្គម និងរួមចំណែកបង្កើនចំណូលថវិកាជាតិ។

ក្នុងឆ្នាំ២០២៥ កម្ពុជា មានក្រុមហ៊ុនអាកាសចរណ៍ជាតិ និងអន្តរជាតិចំនួន៣១ ដែលកំពុងហោះហើរចេញ-ចូល និងគិតជាមធ្យម មានជើងហោះហើរទ្វេទិស (Flight Movements) ចំនួន ១ ៣២៤ជើង ក្នុងមួយសប្តាហ៍ ក្នុងនោះជើងហោះហើរទ្វេទិស នៅអាកាសយានដ្ឋានអន្តរជាតិភ្នំពេញចំនួន ៩៤២ជើង អាកាសយានដ្ឋានអន្តរជាតិសៀមរាបអង្គរ ៣៤៦ជើង និងអាកាសយានដ្ឋានអន្តរជាតិខេត្តព្រះសីហនុ ៣៦ជើង។

ក្នុងឆ្នាំ២០២៥ នេះដែរ កម្ពុជា ក៏រំពឹងថា នឹងទទួលបានក្រុមហ៊ុនអាកាសចរណ៍ថ្មី ដូចជាក្រុមហ៊ុនអាកាសចរណ៍ Indigo Airlines ពីប្រទេសឥណ្ឌា, Etihad Airways ពីប្រទេសអេមីរ៉េតអារ៉ាប់រួម និង Turkish Airlines ពីប្រទេសតួកគី ព្រមទាំងការពង្រីកជើងហោះហើរថ្មីបន្ថែមរបស់ក្រុមហ៊ុនអាកាសចរណ៍ Emirates Airlines ពីប្រទេសអេមីរ៉េតអារ៉ាប់រួម មកកាន់ខេត្តសៀមរាប៕