ភ្នំពេញ៖ ក្រុមហ៊ុន Chilwee Group ដែលជាក្រុមហ៊ុនផលិតអាគុយប្រើប្រាស់ប្រព័ន្ធបច្ចេកវិទ្យាទំនើប និងឈានមុនគេមកពីខេត្តចឺជាំង ប្រទេសចិន មានបំណងពង្រីកអាជីវកម្មលើវិស័យកសិកម្ម និងថាមពល នៅកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី២៨ ខែកុម្ភៈ ឆ្នាំ២០២៥។

ក្នុងជំនួបជាមួយគណៈប្រតិភូក្រុមហ៊ុន Chilwee Group ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានលើកទឹកចិត្តឱ្យក្រុមហ៊ុនឆាប់សម្រេចចិត្តមកបណ្តាក់ទុនវិនិយោគនៅកម្ពុជា ព្រោះកម្ពុជា មានសក្តានុពលក្នុងវិស័យកសិកម្ម និងកសិ-ឧស្សាហកម្ម ជាពិសេសការកែច្នៃស្វាយចន្ទី និងខេត្តសក្តានុពលសម្រាប់ដាំដុះស្វាយចន្ទីនៅកម្ពុជាផងដែរ ដែលបច្ចុប្បន្នស្វាយចន្ទី គឺជាវិស័យដែលមានសក្តានុពលក្នុងការវិនិយោគ និងជាដំណាំកសិកម្មដែលអាចទាញយកផលប្រយោជន៍ជាអតិបរមា។

ជាមួយគ្នានេះ ឯកឧត្តម ជា វុទ្ធី បានបន្តថា វិស័យថាមពលនៅកម្ពុជា ក្រុមហ៊ុនអាចផលិតអាគុយសម្រាប់បម្រើឱ្យការបំពាក់សូទ្បា ស្តុកថាមពល និងការផ្តត់ផ្គង់ដល់ទោចក្រយានយន្តជាដើម។ ក្នុងនោះ លោក លាន់ អ៊ីនតុង (Luan Yundong) ប្រធានគណៈកម្មការមាត្រដ្ឋានអាគុយ និងជាប្រធានសមាគមឧស្សាហកម្មអាគុយរបស់ក្រុមហ៊ុន Chilwee Group បានលើកឡើងថា ក្រុមហ៊ុន នឹងគិតគូរពិចារណាក្នុងការបណ្តាក់ទុនវិនិយោគនៅកម្ពុជាតាមការចង្អុលបង្ហាញរបស់ក្រុមប្រឹក្សាអភិវឌ្ឍន៍កម្ពុជា៕