ភ្នំពេញ៖ វិទ្យាស្ថានស្រាវជ្រាវថាមពលកូរ៉េ បានស្នើសុំការសហការពីសភាពាណិជ្ជកម្មកម្ពុជា ក្នុងការអនុវត្តគម្រោងកែច្នៃសម្បកគ្រាប់ស្វាយចន្ទីទៅជាជីវថាមពល និងជីសរីរាង្គ នៅប្រទេសកម្ពុជា។ បើតាមការចុះផ្សាយរបស់សភាពាណិជ្ជកម្មកម្ពុជា កិច្ចសហប្រតិបត្តិការនេះ អាចផ្ដល់ប្រយោជន៍មកកាន់សេដ្ឋកិច្ច គាំទ្រដល់កំណើនការងារប្រជាជន និងបង្កើនប្រាក់ចំណូលសម្រាប់ជាតិ។

ក្នុងជំនួបជាមួយ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា កាលពីថ្ងៃទី៤ ខែមេសា ឆ្នាំ២០២៤ គណៈប្រតិភូកូរ៉េ បានលើកឡើង និងបានបង្ហាញអំពីរបកគំហើញ និងបច្ចេកវិទ្យាថ្មីក្នុងការកែច្នៃសម្បកគ្រាប់ស្វាយចន្ទីទៅជាជីវថាមពល និងជីសរីរាង្គដែលនឹងផ្ដល់អត្ថប្រយោជន៍ជាច្រើនមកកាន់ប្រទេសកម្ពុជា។ នាឱកាសនោះ អ្នកឧកញ៉ា លឹម ហេង គាំទ្រចំពោះការស្រាវជ្រាវរបស់វិទ្យាស្ថានស្រាវជ្រាវថាមពលកូរ៉េមួយនេះ ដែលជាកត្តារួមចំណែក ក្នុងការបង្កើនទំនាក់ទំនងសេដ្ឋកិច្ចកម្ពុជា-កូរ៉េ។

អនុប្រធានសភាពាណិជ្ជកម្មកម្ពុជា អ្នកឧកញ៉ា លឹម ហេង បានសាកសួរអំពីគម្រោងរោងចក្រនៅក្នុងប្រទេសកម្ពុជា និងបានសិក្សាបន្ថែម អំពីលទ្ធភាពក្នុងការសហការជាមួយវិទ្យាស្ថានស្រាវជ្រាវថាមពលកូរ៉េ ក្នុងការដឹកនាំគម្រោងមួយនេះផងដែរ។ លើសពីនេះ អ្នកឧកញ៉ា លឹម ហេង ក៏បានឯកភាពចំពោះការទស្សនកិច្ចនៅប្រទេសកូរ៉េតាមសំណើររបស់គណៈប្រតិភូកូរ៉េ ដើម្បីស្វែងយល់អំពីសង្វាក់ផលិតកម្មនៃថាមពលនេះឱ្យកាន់តែស៊ីជម្រៅផងដែរ៕