ភ្នំពេញ៖ ម៉ាឡេស៊ី មានបំណងចង់ទិញអង្ករ និងត្រីរ៉ស់របស់កម្ពុជា ដើម្បីបំពេញតម្រូវការបញ្ហាសន្តិសុខស្បៀងដែលមានការខ្វះខាត បន្ថែមលើនេះ ម៉ាឡេស៊ី ក៏បានបង្ហាញចំណាប់អារម្មណ៍លើការវិនិយោគផលិតទឹកដោះគោស្រស់ ក្នុងប្រទេសកម្ពុជាផងដែរ។ នេះបើយោងតាមការចុះផ្សាយរបស់ ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី២៥ ខែកុម្ភៈ ឆ្នា២០២៥។

ក្នុងជំនួបជាមួយឯកឧត្តម Datuk Seri Haji Mohamad bin Sabu រដ្ឋមន្ត្រីក្រសួងកសិកម្ម និងសន្តិសុខស្បៀងនៃម៉ាឡេស៊ី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថាកម្ពុជា-ម៉ាឡេស៊ី មានចំណុចបំពេញឱ្យគ្នាច្រើនទៅវិញទៅមក ដោយសារប្រទេសកម្ពុជាមានសក្ដានុពលលើការដាំដុះស្រូវ និងផលិតកម្មអង្ករមានគុណភាព ព្រមទាំងសម្បូរត្រី ស្របពេលដែលប្រទេសម៉ាឡេស៊ី មានតម្រូវការ។

ឯកឧត្តម ឌិត ទីណា បានបន្តថា ប្រទេសទាំងពីរនឹងសហការគ្នា ដោយកម្ពុជាស្នើភាគីម៉ាឡេស៊ីឱ្យបន្ធូរបន្ថយរបាំងបច្ចេកទេស ដូចជា របាំងអនាម័យ ភូតគាមអនាម័យ ដើម្បីសម្រួលដល់ការនាំចេញកសិផលកម្ពុជាទៅម៉ាឡេស៊ី។ ជាមួយគ្នានេះ ឯកឧត្តម ឌិត ទីណា បានសាទរដល់ប្រទេសម៉ាឡេស៊ី ដែលចង់បានអង្ករប្រណិតប្រកបដោយគុណភាពខ្ពស់ ខណៈដែលស្រូវអង្ករកម្ពុជា ជាផលិតផលប្រណិត មានគុណភាពល្អ និងរសជាតិឆ្ងាញ់ផងដែរ។

ក្នុងកិច្ចពិភាក្សាខាងលើនេះ ឯកឧត្តមរដ្ឋមន្ដ្រីកសិកម្មនៃប្រទេសទាំងពីរ បានឯកភាពលើកកម្ពស់កសិ-ពាណិជ្ជកម្មរវាងគ្នា ដែលសំដៅដល់ការដោះស្រាយបញ្ហារបស់ប្រជាពលរដ្ឋឱ្យទទួលបានផលប្រយោជន៍ទៅវិញទៅមក ដោយប្រទេសកម្ពុជាមានទីផ្សារស្រូវអង្ករ ហើយប្រទេសម៉ាឡេស៊ីទទួលបានសន្តិសុខស្បៀង មានហូបគ្រប់គ្រាន់ ទាំងអង្ករ និងត្រីផងដែរ៕