ភ្នំពេញ៖ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជំរុញឱ្យប្រជាកសិករចងក្រងជាសហគមន៍កសិកម្មទំនើប ដាំដុះនូវពូជស្រូវយុទ្ធសាស្រ្តរបស់ជាតិ រួមមានស្រូវសែនក្រអូប ផ្ការំដួល និងចំប៉ីស៧០ ជាដើម។

ឯកឧត្តម ឃុន សាវឿន លើកឡើងថា ការដាំដុះពូជស្រូវយុទ្ធសាស្រ្តរបស់ជាតិ គឺមានតម្រូវការក្នុងទីផ្សារ ដាំដុះស្រូវតាមការចុះកិច្ចសន្យាទិញលក់ទុកជាមុន កាត់បន្ថយការចំណាយលើ ជី-ថ្នាំកសិកម្ម និងទទួលបានផលចំណេញច្រើន។ ក្នុងឱកាសចុះពិនិត្យការប្រមូលផលស្រូវ និងជួបជាមួយម្ចាស់រោងម៉ាស៊ីនកិនស្រូវ នៅខេត្តសៀមរាប កាលពីថ្ងៃទី១២ ខែសីហា ឆ្នាំ២០២៥ ឯកឧត្តម ឃុន សាវឿន ក៏បានសម្របសម្រួល និងស្នើឱ្យម្ចាស់រោងម៉ាស៊ីនជួយប្រមូលទិញស្រូវពីប្រជាកសិករក្នុងតម្លៃសមរម្យទទួលយកបានទាំងសងខាងផងដែរ។

ជាមួយគ្នានេះ ឯកឧត្តម ឃុន សាវឿន បានណែនាំឱ្យមន្ត្រីជំនាញ និងមន្រ្តីកសិកម្មឃុំ-សង្កាត់ បន្តផ្តល់ការគាំទ្របច្ចេកទេស និងផ្សព្វផ្សាយអំពីស្ថានភាពតម្លៃស្រូវតាមទីផ្សារ ដល់ប្រជាកសិករ៕