ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានប្រជុំពិភាក្សាលើសំណើរបស់អគ្គនាយកដ្ឋានកៅស៊ូ ដែលសុំគោលការណ៍រៀបចំកម្មវិធីប្រឡងចៀរជ័រកៅស៊ូ និងពិធីប្រារព្ធខួប ១០០ឆ្នាំ នៃដើមកៅស៊ូចំណាស់ជាងគេនៅកម្ពុជា នៅទីស្តីការក្រសួងកសិកម្ម។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី២១ ខែឧសភា ឆ្នាំ២០២៤។

ក្នុងកិច្ចប្រជុំ ដែលធ្វើឡើងកាលពីថ្ងៃទី២១ ឧសភានេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម បានប្រសាសន៍តម្រង់ទិសដល់អគ្គនាយកដ្ឋានកៅស៊ូយ៉ាងដូច្នេះថា៖ «ការប្រឡងប្រជែងចៀរជ័រកៅស៊ូនេះ ត្រូវរៀបចំឱ្យមានលក្ខណៈសប្បាយរីករាយ និងត្រូវជំរុញការផ្សព្វផ្សាយឱ្យបានទូលំទូលាយ ដើម្បីទទួលបានការគាំទ្រ និងទាក់ទាញចំណាប់អារម្មណ៍សាធារណជនឱ្យបានច្រើន។ កម្មវិធី ដែលបង្ហាញពីសមត្ថភាពចៀរជ័ររបស់កម្មករប្រកបរបរចៀរជ័រកៅស៊ូនេះ ត្រូវវាយតម្លៃ និងដាក់ពិន្ទុដោយសុក្រឹត្យ ស្របតាមលក្ខខណ្ឌកំណត់ ដោយផ្ដោតលើល្បឿននៃការចៀរជ័រ និងសោភណ្ឌភាព ពិសេសភាពត្រឹមត្រូវតាមបច្ចេកទេសនៃការចៀរជ័រកៅស៊ូ»។

ពាក់ព័ន្ធនឹងការរៀបចំពិធីប្រារព្ធខួប ១០០ឆ្នាំ នៃចម្ការកៅស៊ូចំណាស់ជាងគេនៅកម្ពុជា ដែលបានដាំដើមកៅស៊ូតាំងពីឆ្នាំ១៩២៤ ឯកឧត្តមរដ្ឋមន្ដ្រីក្រសួងកសិកម្ម បានឯកភាពរៀបចំតាមផែនការដែលបានគ្រោងទុករបស់អគ្គនាយកដ្ឋានកៅស៊ូ។ ក្រៅពីនេះ ឯកឧត្តមរដ្ឋមន្ដ្រី ឌិត ទីណា ក៏មានគោលដៅរៀបចំទីតាំងចម្ការកៅស៊ូចំណាស់ជាងគេនេះ ឱ្យក្លាយទៅជា«សួនអភិរក្សចម្ការកៅស៊ូចាស់ជាងគេនៅកម្ពុជា»នាពេលខាងមុខផងដែរ៕