ភ្នំពេញ៖ មជ្ឈមណ្ឌលបណ្ដុះធុរកិច្ចថ្មី «តេជោ» កំពុងស្វែងរកអ្នកតម្រង់ទិស ដែលមានបំណងសិក្សាបន្ថែមអំពីវិធីសាស្ត្រក្នុងការតម្រង់ទិស លើកស្ទួយសហគ្រិនភាពបច្ចេកវិទ្យាស្អាត ចូលរួមចំណែកការពារបរិស្ថាន និងកាត់បន្ថយការប្រែប្រួលអាកាសធាតុ តាមរយៈការតម្រង់ទិសដល់ធុរកិច្ចថ្មី និងសហគ្រាសធុនតូច និងមធ្យម ក្នុងកម្មវិធីពន្លឿនអាជីវកម្ម GCIP Cambodia រដូវកាលទី២។

បើតាមការបញ្ជាក់របស់មជ្ឈមណ្ឌលបណ្ដុះធុរកិច្ចថ្មី «តេជោ» អ្នកតម្រង់ទិស នឹងរួមចំណែកដើរតួយ៉ាងសំខាន់ក្នុងការគាំទ្រ និងណែនាំដល់ការចាប់ផ្តើមអាជីវកម្ម និងសហគ្រាសធុនតូច និងមធ្យម ដែលចូលរួមក្នុងកម្មវិធីនេះ។ ចំពោះសាធារណជន ដែលមានចំណាប់អារម្មណ៍ចែករំលែកចំណេះដឹង និងសិក្សាបន្ថែមក្នុងកម្មវិធីនេះ អាចដាក់ពាក្យមកកាន់ https://bit.ly/GCIP_Mentor_Cohort_2 ។

មជ្ឈមណ្ឌលបណ្ដុះធុរកិច្ចថ្មី «តេជោ» គឺជាភ្នាក់ងារអនុវត្តគម្រោង «ពន្លឿននវានុវត្តន៍ និងសហគ្រិនភាពបច្ចេកវិទ្យាស្អាតក្នុងធុរកិច្ចថ្មី និងសហគ្រាសធុនតូច និងមធ្យមនៅកម្ពុជា (GCIP Cambodia)»។ ចំណែក GCIP Cambodia រដូវកាលទី២ គឺជាកម្មវិធីរយៈពេល ៦ខែ ដែលមានគោលបំណងគាំទ្រដល់ការចាប់ផ្តើមអាជីវកម្ម និងសហគ្រាសធុនតូច និងមធ្យមនៅកម្ពុជា រួមទាំងផ្តល់ជាដំណោះស្រាយប្រកបដោយភាពច្នៃប្រឌិតនៃបច្ចេកវិទ្យាស្អាត ដែលរួមចំណែកកាត់បន្ថយការបំភាយឧស្ម័នផ្ទះកញ្ចក់(GHG) និងហានិភ័យក្នុងការពង្រីកអាជីវកម្ម៕