ភ្នំពេញ៖ សម្តេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាល បានសម្រេចចិត្តផ្ដល់ថវិកាចំនួន ៦០លានដុល្លារ វិនិយោគពង្រីកហេដ្ឋារចនាសម្ព័ន្ធទឹកស្អាត និងបណ្ដាញទឹកស្អាត រយៈពេល បីឆ្នាំ ដើម្បីផ្គត់ផ្គង់ជូនប្រជាពលរដ្ឋតាមសំណើរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ នេះបើតាមការចុះផ្សាយរបស់សម្តេចធីបតី ហ៊ុន ម៉ាណែត នាថ្ងៃទី១៧ ខែកុម្ភៈ ឆ្នាំ២០២៥។

ការពង្រីកហេដ្ឋារចនាសម្ព័ន្ធទឹកស្អាតនេះ គឺសម្រាប់ផ្គត់ផ្គង់ដល់ខេត្តចំនួន ៥រួមមាន៖ រដ្ឋាករទឹកកំពត, រដ្ឋាករទឹកស្វាយរៀង, រដ្ឋាករទឹកក្រុងស្ទឹងសែន នៅខេត្តកំពង់ធំ, រដ្ឋាករទឹកមណ្ឌលគិរី និងរដ្ឋាករទឹកពោធិ៍សាត់។ ជាមួយគ្នានេះ សម្តេចធិបតី ហ៊ុន ម៉ាណែត បានលើកឡើងថា ការផ្គត់ផ្គង់ទឹកស្អាតជូនប្រជាពលរដ្ឋ គឺជាកិច្ចការមួយដែលរាជរដ្ឋាភិបាលបានយកចិត្តទុកដាក់ខ្លាំងជាច្រើនអាណត្តិមកហើយ។

សម្តេចធិបតីនាយករដ្ឋមន្ត្រី បានបន្តថា រាជរដ្ឋាភិបាល ក៏បានកសាងបណ្ដាញទឹកស្អាតដែលគ្របដណ្ដប់តំបន់ជាច្រើននៅតាមបណ្ដារាជធានី-ខេត្តទូទាំងប្រទេស ដោយសារកំណើនប្រជាពលរដ្ឋ ធ្វើឱ្យតម្រូវការផ្គត់ផ្គង់ទឹកស្អាតកាន់តែមានច្រើនឡើងជាលំដាប់ ពិសេសនៅតំបន់ជនបទ និងតំបន់ដែលកកើតថ្មីៗជុំវិញទីក្រុងនិងទីប្រជុំជនធំៗ៕