ភ្នំពេញ៖ ក្នុងរយៈពេល ៧ខែនៃឆ្នាំ២០២៤ ប្រទេសចិន នៅតែឈរលើលេខរៀងទី១ និងជាដៃគូនាំចេញ និងនាំចូលទំនិញធំជាងគេរបស់កម្ពុជា ដែលមានទំហំពាណិជ្ជកម្មជាង ៨,៧២ពាន់លានដុល្លារ កើនឡើង២៣% បើធៀបនឹងរយៈពេលដូចគ្នាក្នុងឆ្នាំ២០២៣ មានទំហំ ៧,០៩ពាន់លានដុល្លារ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ចេញផ្សាយនាថ្ងៃទី០៩ ខែសីហា ឆ្នាំ២០២៤។

ចំពោះ ការនាំចេញ-នាំចូលទំនិញសរុបទៅកាន់ទីផ្សារអន្តរជាតិក្នុងរយៈពេល ៧ខែ កម្ពុជា សម្រេចបានជាង ៣១,១៨ពាន់លានដុល្លារ កើនឡើង១៥% បើធៀបនឹងរយៈពេលដូចគ្នាក្នុងឆ្នាំ២០២៣។ ក្រៅពីប្រទេសចិន ប្រទេសដែលកម្ពុជាមានទំហំពាណិជ្ជកម្មធំបន្តបន្ទាប់ទៀត រួមមាន៖ សហរដ្ឋអាម៉េរិក កម្ពុជាសម្រេចបានទំហំ ៥,៦៦ពាន់លានដុល្លារ, ប្រទេសវៀតណាម សម្រេចបាន ៤,៦០ពាន់លានដុល្លារ, ប្រទេសថៃ កម្ពុជាសម្រេចបាន ២,៤១ពាន់លានដុល្លារ និងប្រទេសជាច្រើនផ្សេងទៀត។

ទំនិញដែលកម្ពុជានាំចេញមានដូចជា សម្លៀកបំពាក់ គ្រឿងបន្ទាប់បន្សំដែលធ្វើពីក្រណាត់ ធញ្ញជាតិ ឈើ និងវត្ថុធ្វើពីឈើ ធ្យូងឈើ បន្លែដែលអាចបរិភោគបាន ស្បែកជើង ស្រោមជើង និងផលិតផលផ្សេងៗទៀត។ ចំណែក ទំនិញ ដែលកម្ពុជានាំចូល រួមមាន៖ រ៉ែប្រើជាគ្រឿងចំហេះ ប្រេងខនិជ ផលិតផលពីការចម្រាញ់ ផលិតផលពីការចាក់ដោយម្ជុល កប្បាស ដែក និងផលិតផលមួយចំនួនផ្សេងទៀត៕