ភ្នំពេញ៖ ក្រសួងប្រៃសណីយ៍ និងទូរគមនាគមន៍ (ក.ប.ទ.) និងក្រសួងបច្ចេកវិទ្យាគមនាគមន៍ និងព័ត៌មានរបស់ហ្វីលីពីន បានផ្ទេរបច្ចេកវិទ្យាឌីជីថលទៅវិញទៅមកចំនួន២ មានដូចជា៖ ថ្នាលផ្ទៀងផ្ទាត់ឯកសារ verify.gov.kh របស់កម្ពុជា និងកម្មវិធី eGov SuperApp របស់ហ្វីលីពីន ដើម្បីជំរុញល្បឿននៃការធ្វើបរិវត្តកម្មរដ្ឋាភិបាលឌីជីថលរបស់ប្រទេសទាំងពីរ។

ប្រព័ន្ធឌីជីថលចំនួន២ ដែលគ្រោងដាក់ឱ្យដំណើរការនៅឆ្នាំ២០២៥ នេះ នឹងជួយប្រទេសទាំងពីរឱ្យមានមូលដ្ឋានកាន់តែរឹងមាំក្នុងការសម្រេចចិត្តជ្រើសរើសបច្ចេកវិទ្យាដែលត្រឹមត្រូវ ដើម្បីយកមកប្រើប្រាស់ក្នុងការអភិវឌ្ឍប្រព័ន្ធឌីជីថល ដែលផ្អែកតាមការផ្លាស់ប្តូរបទពិសោធ និងធ្វើឱ្យចំណងការទូតរវាងកម្ពុជា និងហ្វីលីពីនកាន់តែមានភាពជិតស្និទ្ធមួយកម្រិតទៀតផងដែរ។

ក្នុងសន្និសីទសារព័ត៌មានរួមគ្នា នាថ្ងៃទី២០ ខែមករា ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្រ្តី ក.ប.ទ. បានមានប្រសាសន៍ថា កម្មវិធី eGov SuperApp របស់ហ្វីលីពីន គឺជាបច្ចេកវិទ្យា បទពិសោធ និងលក្ខណៈពិសេសនៃកម្មវិធីនេះ នឹងរួមចំណែកយ៉ាងសំខាន់ក្នុងការអភិវឌ្ឍកម្មវិធី DG SuperApp របស់កម្ពុជា។ ជាមួយគ្នានេះ ឯកឧត្តម Ivan John E. Uy រដ្ឋមន្ត្រីក្រសួងបច្ចេកវិទ្យាគមនាគមន៍និងព័ត៌មានរបស់ហ្វីលីពីន បានបន្ថែមថា ការប្រើប្រាស់ថ្នាលផ្ទៀងផ្ទាត់ឯកសារ verify.gov.ph របស់កម្ពុជាសម្រាប់ហ្វីលីពីន គឺដើម្បីលុបបំបាត់ការក្លែងបន្លំឯកសារនានាដែលចេញដោយអាជ្ញាធរមានសមត្ថកិច្ចរបស់សាធារណរដ្ឋហ្វីលីពីន និងផ្តល់ភាពងាយស្រួលដល់ប្រជាជនក្នុងការយកទៅប្រើប្រាស់៕