ភ្នំពេញ៖ សម្ដេចធិបតី ហ៊ុន ម៉ាណែត សម្រេចឧបត្ថម្ភថវិកាសរុបចំនួន ៥០ម៉ឺនដុល្លារ ដល់សមាគមសិល្បករខ្មែរ សម្រាប់ប្រើប្រាស់ក្នុង១ឆ្នាំ ១០ម៉ឺនដុល្លារ រយៈពេល៥ឆ្នាំ ដើម្បីជួយទ្រទ្រង់ និងធានានិរន្តរភាពសមាគមសិល្បករខ្មែរ។

ក្រៅពីការឧបត្ថម្ភថវិកា ៥០ម៉ឺនដុល្លារនេះ សម្តេចធិបតីនាយករដ្ឋមន្រ្តី ក៏សម្រេចបង្កើតមូលនិធិផ្ទាល់ខ្លួន ដើម្បីអភិរក្ស និងផ្តល់លទ្ធភាពឱ្យទម្រង់សិល្បៈដែលរងហានិភ័យ ឬប្រឈមនឹងការបាត់បង់នៅគង់វង្សយូរអង្វែងសម្រាប់កូនចៅជំនាន់ក្រោយ។ បើតាមការលើកឡើងរបស់សម្តេចធិបតីនាយករដ្ឋមន្រ្តី ក្នុងពិធីអ្នកស្នងមរតក មូលនិធិផ្ទាល់ខ្លួននេះ នឹងមានលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជាប្រធាន។

«ពិធីអ្នកស្នងមរតក» ដែលរៀបចំឡើងដោយសមាគមសិល្បករខ្មែរ ធ្វើឡើងក្នុងគោលបំណងជួបជុំ រំលឹកដល់គុណូបការៈ និងបង្ហាញការយកចិត្តទុកដាក់ដល់ព្រឹទ្ធាចារ្យ វីរសិល្បករ លោកគ្រូ អ្នកគ្រូ សិល្បករ សិល្បការនីគ្រប់ទម្រង់ ដើម្បីបង្កើនចំណងមិត្តភាព សាមគ្គីភាព រួមគ្នាលើកស្ទួយវិស័យវប្បធម៌សិល្បៈរបស់ជាតិ។ ពិធីនេះ ប្រព្រឹត្តឡើងនៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ(CCIC) កាលពីថ្ងៃទី៣១ ខែឧសភា ឆ្នាំ២០២៤៕